पंतप्रधान मोदींना जीवे मारेन; दारूड्याची धमकी

मुख्तार अली नामक एका इसमाने पंतप्रधान नरेंद्र मोदी यांची हत्या करण्याची धमकी देणारा फोन केल्यामुळे, सुरक्षा यंत्रणांचे धाबे दणाणले. मुख्तार अलीने  दिल्ली पोलीस कंट्रोल रूममध्ये फोन केला आणि पंतप्रधान मोदींना जीवे मारण्याची धमकी देत त्यांच्याविषयी अपशब्द वापरले. हा फोन नेमका कुठून आला हे शोधून काढून पोलीस तात्काळ त्याठिकाणी पोहचले आणि मुख्तारला आपल्या ताब्यात घेतले. चौकशीदरम्यान पोलिसांच्या लक्षात आले की, आरोपीने दारूच्या नशेत पोलीस कंट्रोल रुममध्ये फोन करत मोदींना जीवे मारून टाकण्याची धमकी दिली. मुख्तारने मद्यधुंद अवस्थेत केलेल्या त्या धमकी देणाऱ्या फोनमुळे पोलीस यंत्रणेमध्ये मात्र काहीकाळ खळबळ उडाली होती. हा थेट देशाच्या पंतप्रधानांच्या सुरक्षेचा प्रश्न असल्यामुळे दिल्ली पोलिसांनी याबाबत त्वरित आयबी, एसपीजी आणि अन्य सुरक्षा यंत्रणांना अलर्ट केले. आरोपीला ताब्यात घेईपर्यंत आणि नेमका प्रकार काय आहे? याचा उलगडा होईपर्यंत दिल्लीतील सर्व सुरक्षा यंत्रणा अधिक सक्रिय झाल्या होत्या. 

दिल्ली पोलिसांकडून मिळालेल्या माहितीनुसार, बुधवार १६ जानेवारी रोजी सकाळी ११ च्या सुमारास दिल्लीच्या पोलीस कंट्रोल रूममध्ये एका अज्ञात व्यक्तीचा फोन आला. फोनवरील व्यक्तीने पंतप्रधान मोदी यांच्याविषयी अपशब्द वापरायला सुरुवात केली आणि थेट त्यांना जीवे मारण्याची धमकी दिली. याशिवाय त्याने भाजपच्या अन्य नेत्यांविषयीसुद्धा अपमानास्पद तसंच अपशब्द वापरले. दरम्यान, या फोनची गंभीर दखल घेत सुरक्षा यंत्रणांनी फोन कुठून आला होता त्याचं लोकेशन तसंच ज्या नंबरवरुन फोन आला होता त्या नंबरधारकाविषयी माहिती गोळा करायला सुरुवात केली. तपासानंतर हा फोन नंद पर्वत भागातून आला असल्याचे समोर आले. या माहितीवरुन, पोलिसांनी रात्री उशिरा आरोपी मुख्तार अली याला ताब्यात घेतले. शिंपी काम करणाऱ्या मुख्तारने दारूच्या नशेत हा प्रकार केल्याचे उघड झाले. पोलिसांनी दिलेल्या माहितीनुसार, ते याप्रकरणाचा सखोल तपास करत असून लवकरच आरोपी मुख्तार याच्यावर कायदेशीर कारवाई केली जाणार आहे.