लोकसभा निवडणूक अगदी तोंडवर आली आहे. या काळात प्रचारासाठी वेगवेगळे फंडे वापरले जातात. त्यातीलच एक म्हणजे टीव्ही मालिकांमधून सध्या पक्षांचा प्रचार होताना दिसत आहे. मात्र निवडणूक आयोगाने टीव्ही मालिकेतून प्रचार करणऱ्या निर्मात्यांना कारणे दाखवा नोटीस बजावली आहे. ‘भाभीजी घर पर है’ तसेच ‘तुझसे हैं राब्ता’ या दूरचित्रवाणी मालिकेच्या निर्मात्यांना संबंधित भागातून राजकीय पक्षाला लाभदायक ठरणारा आक्षेपार्ह मजकूर वगळण्यात यावा, असे सांगितले होते. तसेच, समाज माध्यमे, इलेक्ट्रॉनिक माध्यमे यासह कोणत्याही प्रकारच्या माध्यमावर आक्षेपार्ह मजकूर असलेला भाग उपलब्ध असणार नाही याची दक्षता घेण्याचे आदेश मुख्य निवडणूक अधिकारी यांच्या कार्यालयाने दिले आहेत.
मालिकांमध्ये राजकीय पक्षांचा प्रचाराच्या स्वरुपातील मजकूर असल्यास, सक्षम प्राधिकाऱ्याकडून पूर्व प्रमाणित करुन घेतल्याशिवाय प्रसारित न करण्याचे आदेश दिले आहेत. तसेच आदर्श आचारसंहितेतील तरतुदी आणि भारत निवडणूक आयोगाच्या अन्य निर्देशांचे काटेकोर पालन करण्याची सक्त ताकीद या मालिकांच्या निर्मात्यांना देण्यात आली आहे.
काँग्रेस पक्षाकडून तक्रार
‘अॅण्ड टीव्ही’ या दूरचित्रवाणी वाहिनीवर ४,५ एप्रिल २०१९ रोजी प्रसारित झालेल्या ‘भाभीजी घर पर है!’ आणि ‘झी टीव्ही’ या वाहिनीवर दिनांक २ एप्रिल रोजी प्रसारित झालेल्या ‘तुझसे हैं राब्ता’ या मालिकेच्या भागामध्ये शासनाच्या योजना तसेच भारतीय जनता पार्टीच्या नेतृत्वाशी संबंधित प्रचार आणि जाहिराती असल्याबाबत तक्रार काँग्रेस पक्षाकडून मुख्य निवडणूक अधिकारी कार्यालयाकडे करण्यात आली होती. ‘भाभीजी घर पर है!’ चे निर्मितीगृह ‘एडीट II प्रॉडक्शन्स’चे बेनीफर कोहली व संजय कोहली आणि ‘तुझसे हैं राब्ता’ च्या निर्मितीगृह ‘फूल हाऊस मीडिया’चे सोनाली पोतनीस आणि अमीर जाफर यांना नोटीस बजावून आचारसंहितेच्या उल्लंघनाबाबत कारवाई का करण्यात येऊ नये याबाबत खुलासा मागविला होता.
आचारसंहितेतील नियमांचा भंग
या दोन्ही निर्मितीगृहांच्या निर्मात्यांनी दाखल केलेला खुलासा आणि मालिकांच्या संबंधित भागांचे चित्रीकरण पाहिल्यानंतर मालिकेतील मजकूर हा विशिष्ट राजकीय पक्ष आणि त्यांच्या नेत्यांच्या कामगिरीची जाहिरातबाजी करणारा असल्याचे तसेच त्याचा मतदारांवर प्रभाव पडू शकेल, असा असल्याचे निदर्शनास आले. या भागातील मजकुरामुळे आदर्श आचारसंहितेतील नियम आणि तरतुदींचा भंग झाल्याचे स्पष्ट झाले आहे.
आयोगाच्या निर्देशांचे पालन करण्याचे आदेश
आदर्श आचारसंहितेच्या कालावधीत कोणताही राजकीय पक्ष, उमेदवाराला लाभदायक ठरेल असा मजकूर प्रसारित करु नये, असे आदेश देण्यात आले असून जाहिरातबाजी करावयाची असल्यास मजकूर पूर्वप्रमाणित करुन घ्यावा; आदर्श आचारसंहितेतील तरतुदी आणि भारत निवडणूक आयोगाच्या अन्य निर्देशांचे काटेकोरपणे पालन करावे, अशी सक्त ताकीदही या मालिकांच्या निर्मात्यांना देण्यात आली आहे.
