अॅमेझॉन प्राइमवरील ‘ये है मिर्झापूर’ या वेब सिरीजची सध्या सगळीकडे हवा आहे. ‘मिर्झापूर’ला देशभरातील प्रेक्षकांकडून तुफान प्रतिसाद मिळाला आहे. प्रेक्षकांकडून मिळत असलेल्या या जबरदस्त प्रतिसादामुळे सिरीजच्या निर्मात्यांनी लवकरात लवकर सीझन-२ बनवण्याचा निर्णय घेतला आहे. याबाबतची माहिती अली फजलने दिली आहे. अलीची या वेबसीरीजमध्ये मध्यवर्ती भूमिका आहे. याविषयी सिरीजचे मेकर्स सांगतात की, ‘मिर्झापूर‘च्या सीझन १ मधील गोष्ट पुढे नेण्यासाठी त्याचा दुसरा भाग काढणं आवश्यक होतंच. पण इतक्या लवकर त्याचा दुसरा भाग काढू असं आम्हाला वाटलं नव्हतं. हे सगळं प्रेक्षकांनी दिलेल्या प्रतिसादामुळे आणि मिर्झापूरवर त्यांनी केलेल्या प्रेमामुळेच शक्य झालं आहे.’ या वेब सीरिजमध्ये पंकज त्रिपाठी, अली फझल, विक्रांत मेसी, दिव्येंदू शर्मा, कुलभूषण खरबंदा, श्वेता त्रिपाठी, श्रिया पिळगावकर, रसिका दुगल, हर्षिता गौर आणि अमित सियाल यांच्या मुख्य भूमिका आहेत. नव्या दमाच्या कलाकारांची टीम, हटके कथानक आणि त्याची प्रभावशाली मांडणी यामुळे ‘मिर्झापूर’ला लाखो प्रेक्षकांची पसंती मिळाली आहे.
त्यामुळे प्रेक्षक मिर्झापूरच्या ‘सीझन २’साठी उत्सुक असणार यात काहीच शंका नाही. अलीने सांगितल्यानुसार, २०१९ मध्ये मिर्झापूरचा भाग २ प्रदर्शित होणार आहे. दुसरा भागही अर्थातच अॅमेझॉन प्राईमवर रिलीज होईल.