अर्शद बनला ‘फ्रॉड सैयाँ’, पाहा टिझर

अभिनेता अर्शद वारसी बऱ्याच काळानंतर पुन्हा एकदा मोठ्या पडद्यावर झळकणार आहे. अर्शदच्या ‘फ्रॉड सैयाँ’ या आगामी चित्रपटाची सर्वांनाच उत्सुकता होती. नुकताच या चित्रपटाचा टिझर रिलीज झाला असून, इंटरनेटवर सध्या त्याचाच बोलबाला आहे. ‘फ्रॉड सैयाँ’ या चित्रपटात अर्शद वारसी आणि आणि सौरभ शुक्ला यांच्या प्रमुख भूमिका आहेत. दरम्यान, चित्रपटाच्या टिझरमधून अर्शद वारसीचा कॉमेडी आणि काहीसा खट्याळ अंदाज आपल्याला पाहायला मिळतो आहे. काही दिवसांपूर्वी या चित्रपटाचं पोस्टर रिलीज झालं होतं. ‘सब मर्द कुत्ते नही है’ अशी या पोस्टरची टॅगलाईन आहे. अर्शदचं चित्रपटातलं कॅरेक्टर या टॅगलाईनला अनुसरुनच असलस्याचं टिझर पाहताना लक्षात येतं. अभिनेते सौरभ शुक्ला यांचीही धमाल कॉमेडी चित्रपटात पाहायला मिळणार आहे. पाकिस्तानी अभिनेत्री सारा लॉरेनही ‘फ्रॉड सैयाँ’मध्ये मुख्य भूमिका साकारत आहे. महिलांना लग्नाचे आमिष दाखवून गंडा घालणाऱ्या एका ‘फ्रॉड’ माणसाची विनोदी गोष्ट, ‘फ्रॉड सैयाँ’ चित्रपटात दाखवण्यात आली आहे. पाहा, चित्रपटाचा धमाल टिझर…

‘फ्रॉड सैंया’ चित्रपटाच्या निमित्ताने अर्षद वारसी आणि सौरभ शुक्ला यांच्या जोडीची केमिस्ट्री पुन्हा एकदा प्रेक्षकांना अनुभवता येणार आहे. याआधी २०१३ साली आलेल्या ‘जॉली एलएलबी’ या चित्रपटात अर्शद आणि सौरभ यांनी एकत्र काम केलं होतं. ‘फ्रॉड सैंया’ चित्रपटातही ही जोडी धमाल करताना दिसणार आहे. ‘फ्रॉड सैंया’ चित्रपटाचं दिग्दर्शन सौरभ श्रीवास्तव यांनी केलं आहे. तर,  प्रकाश झा आणि कनिष्क गंगवाल यांनी चित्रपटाची निर्मिती केली आहे. श्रीवास्तव यांनी २००८ मध्ये आलेल्या ‘ओह माय गॉड’ या चित्रपटाचं आणि काही टीव्ही मालिकांचं दिग्दर्शन केलं आहे. ‘कॉमेडी ड्रामा’ या जॉनरमधला हा ‘फ्रॉड सैंया’ चित्रपट पुढील वर्षी १८ जानेवारी रोजी प्रदर्शित होणार आहे.