मिशिन बिगिन अगेनच्या पाचव्या टप्प्यात राज्यातंर्गत रेल्वे सेवा सुरु करण्याची परवागी देण्यात आली आहे. त्यामुळे मध्य रेल्वेने पाच जिल्यादरम्यान 5 विशेष रेल्वे गाड्या चालविण्याचा निर्णय घेतला आहे. त्यानूसार मुंबईतील छत्रपती शिवाजी महाराज टर्मिनस ते नागपूर, पुणे, गोंदिया व सोलापूर या जिल्हांच्या दरम्यान या गाड्या 9 ऑक्टोबरपासून धावणार आहे. त्यामुळे या जिल्ह्यातील प्रवाशांना मोठा दिलासा मिळणार आहे.
कोरोना महामारीमुळे 21 मार्चपासून राज्यातील रेल्वे मार्गावरील प्रवासी गाड्या बंद ठेवण्यात आल्या होत्या. यामुळे गेले सहा महिने केवळ कोविड-19 चे नियम पाळून अत्यावश्यक सेवेत मोडणारी मालवाहतूक तसेच अडकून पडलेल्या कामगारांना त्यांच्या मुळ राज्यात पोहोचवण्यासाठी श्रमिक स्पेशल गाड्या सुरु होत्या. मात्र आता अनलॉक 4 तसेच त्या पाठोपाठ अनलॉक 5 नियम जारी करण्यात आल्याने ठप्प असलेले व्यवहार पूर्ववत होऊ लागले आहेत.
तसेच राज्यातील रेल्वे सेवा सुरु करण्यास परवानगी सुद्धा दिली आहे. त्यामुळे अखेर मुंबई, नागपूर, पुणे, गोंदिया व सोलापूर या पाच शहरांदरम्यान विशेष रेल्वे गाड्या सुरु करण्याचा निर्णय घेण्यात आला आहे. 9 ऑक्टोबरपासून 02189 मुंबई- नागपूर दुरांतो एक्स्प्रेस, 02123 मुंबई-पुणे डेक्कन क्कीन सुपरफास्ट एक्स्प्रेस, 02105 मुंबई- गोंदिया विर्दभ एक्स्प्रेस, 02115 मुंबई-सोलापूर सुपरफास्ट एक्स्प्रेस आणि 02015 मुंबई-पुणे इंद्रायणी सुपरफास्ट एक्स्प्रेस या रेल्वे गाड्या सुरु करण्यात येणार आहे. दररोज दोन्ही बाजूंकडून पाच स्पेशल ट्रेन धावणार आहे. त्यामुळे या जिल्हांचा प्रवाशांना मोठा दिलासा मिळणार आहे.
