गणेशमूर्ती विसर्जनासाठी गेलेले दोन युवक पाण्यात बुडाले, यापैकी एक जणाला वाचविण्यात यश आले असुन दुस-याचा शोध सुरु आहे.
पोलीसांनी दिलेली माहिती अशी, गजानन पार्क, सिन्नर फाटा येथील काही युवक मंगळवारी(दि.१) दुपारी साडेतीन वाजता गणपती विसर्जनासाठी चेहेडी व बेलतगव्हाण शिवारात वालदेवी नदीच्या संगमावर गेले होते. कुटुंबासह गणपती विसर्जन करण्यासाठी गेले होते, मात्र यावेळी अजिंक्य गायधनी याला पाण्याचा अंदाज न आल्याने त्याचा पाय खडकावरुन निसटल्याने खोल पाण्यात पडला. अजिंक्य बुडत असतांना त्याला वाचविण्यासाठी चरण कुंडलीक भागवत (२५) याने अजिंक्यला वाचविण्यासाठी पाण्यात उडी मारली, परंतू चरण भागवतही पाण्यात बुडायला लागला. मासेमा-यांनी त्यांच्या जवळील ट्यूब चरणच्या दिशेने फेकत त्याला वाचविण्यात त्यांना यश आले, स्थानिक नगरसेविका सत्यभामा गाडेकर यांना घटनेची माहिती मिळताच त्यांनी अग्निशमन दलाला व पोलीसांना पाचारण केले. वालदेवी नदीचा प्रवाह तीव्र असल्याने याठिकाणी बचाव दलाला शोध कार्यात अडथळा येत आहे.
