राँग साईडने आलेला टेम्पो ठरला ‘काळ’!

सांगली शहरातील एसटी स्टँडजवळ गुरुवारी रात्री एक विचित्र अपघात घडला. रात्री ८ वाजण्याच्या सुमारास स्टँड परिसरात एक टेम्पो भरधाव वेगात आणि तोही चुकीच्या दिशेने आला. यावेळी रस्ता ओलांडून जाणाऱ्या एका व्यक्तीला या टेम्पोने जोरदार धडक दिली. टेम्पोचा वेग नियंत्रणाबाहेर असल्यामुळे त्या पादचाऱ्याला टेम्पोची जोरदार धडक बसली. या धडकेत त्याचा जागीच मृत्यू झाला. सूत्रांकडून मिळालेल्या माहितीनुसार, मंगेश राजाराम बामणे (३५) असं मृत व्यक्तीचं नाव असून, मंगेश सांगलीमध्येच रिक्षा चालवण्याचं काम करायचे. या अपघातात त्यांची काहीच चूक नसताना चुकीच्या दिशेने आलेला हा टेम्पो त्यांच्यासाठी ‘काळ’ ठरला. मंगेश यांच्या एकाएकी जाण्यामुळे त्यांच्या कुटुंबियांना जबर धक्का बसला आहे. 

मंगेश गुरुवारी रात्री रिक्षा स्टँडवरून शिवाजी पुतळा परिसराकडे निघाले होते. यावेळी चुकीच्या दिशेने येत असलेल्या एका वेगवान टेम्पोची त्यांना धडक बसली. या अपघातात मंगेश टेम्पोच्या मागील चाकाखाली सापडले आणि जागीच त्यांचा दुर्दैवी अंत झाला. या अपघातानंतर टेम्पो चालकाने काही अंतरावर जाऊन गाडी थांबवली आणि स्वत: शहर पोलीस ठाण्यात जाऊन सविस्तर प्रकार पोलिसांना सांगितला. घटनेची माहिती मिळाल्यावर सांगली शहर पोलीस ठाण्याचे सहायक पोलीस निरीक्षक आपल्या सहकाऱ्यांसह घटनास्थळी पोहोचले. त्यानंतर संपूर्ण घटनेचा पंचनामा करुन मंगेश यांचा मृतदेह शवविच्छेदनासाठी पाठवण्यात आला. दरम्यान, सध्या कबुली देणाऱ्या टेम्पो चालकाला पोलिसांनी ताब्यात घेतलं असून, अपघात नक्की कसा झाला? यासंदर्भात पोलीस त्याची चौकशी करत आहेत. या अपघातामुळे मंगेश यांच्या परिवाराला खूप मोठा धक्का बसला आहे.