कोरची येथे झालेल्या चकमकीत २ नक्षल्याना कंठस्नान

गडचिरोली धानोरा व कोरची तालुक्याच्या सीमावर्ती भागात असलेल्या न्याहाकल-हेटळकसा जंगल परिसरात आज, सोमवारी सकाळी पोलिसांशी झालेल्या चकमकीत दोन नक्षलवादी ठार झाले आहेत. सूत्रांनी दिलेल्या माहितीनुसार, न्याहाकल-हेटळकसा जंगल परिसरात नक्षलवादी असल्याची माहिती मिळताच सी-६० पथकाच्या जवानांनी त्या भागात नक्षलविरोधी अभियान राबविण्यास सुरुवात केली. या पथकासमवेत पोलिस विभागाचे वरिष्ठ अधिकारीही होते. दरम्यान आज सकाळी नक्षल्यांनी पोलिसांवर गोळीबार केला. पोलिसांनी जोरदार प्रत्युत्तर दिले. त्यानंतर नक्षलवादी घनदाट जंगलात पसार झाले. पोलिसांना घटनास्थळावर दोन नक्षल्यांचे मृतदेह आढळून आले असून, ते ताब्यात घेतले आहेत. नक्षल्यांची शस्त्रे व काही दैनंदिन वापराचे साहित्यही पोलिसांना मिळाले आहे. अजूनही त्या भागात नक्षलविरोधी अभियान सुरुच आहे. मृत नक्षल्यांची संख्या वाढण्याचा अंदाज पोलिसांनी वर्तवला आहे.