राज्याच्या मंत्रीमंडळ विस्ताराचा मुहूर्त निश्चित झाला असून १४ जून रोजी नवीन मंत्र्यांना शपथ दिली जाणार असल्याचे सुत्रांनी स्पष्ट केले आहे. यामध्ये माजी उपमुख्यमंत्री विजयसिंह मोहिते-पाटील, शिवसेनेचे उपनेते आ. तानाजी सावंत यांचा मंत्रीमंडळ प्रवेश निश्चित मानला जात आहे. यामुळे सोलापूर जिल्ह्यास अजून दोन मंत्रीपदे मिळणार आहेत.
मंत्रीमंडळ विस्तारात भाजपा व शिवसेनेच्या प्रत्येकी दोन मंत्र्यांचा समावेश होणार आहे. लोकसभेपुर्वी भाजपाच्या जवळ आलेले माजी उपमुख्यमंत्री विजयसिंह मोहिते-पाटील यांच्यामुळे भाजपाचा मोठा फायदा झाला. राष्ट्रवादीचा बालेकिल्ला असलेल्या माढा लोकसभा मतदारसंघात भाजपाचे रणजितसिंह निंबाळकर यांच्या विजयात मोहिते-पाटील यांचा सिहाचा वाटा आहे.
तसेच त्यांचा प्रभाव सोलापूर, मावळ, बारामती या मतदारसंघावर देखील पडला. राज्याच्या मंत्रीमंडळात अनेक वर्षे प्रतिनिधीत्व केलेले मोहिते- पाटील हे प्रभावी व अनुभवी नेते समजले जात असून त्यांच्या माध्यमातून बारामतीकरांना मोठे आव्हान निर्माण झाले आहे.
