आयडॉलच्या अभ्यासक्रमाच्या प्रवेशास सुरुवात

विविध अभ्यासक्रमाच्या प्रवेशास ८ सप्टेंबरपासून सुरुवात झाली. २३ सप्टेंबर २०२० पर्यंत हे प्रवेश सुरु राहतील.

मुंबई विद्यापीठाच्या दूर व मुक्त अध्ययन संस्थेच्या (आयडॉल) शैक्षणिक वर्ष २०२०-२१ च्या विविध अभ्यासक्रमाच्या प्रवेशास ८ सप्टेंबरपासून सुरुवात झाली. २३ सप्टेंबर २०२० पर्यंत हे प्रवेश सुरु राहतील. हे प्रवेश ऑनलाईन असतील.

२०२०-२१ या शैक्षणिक वर्षासाठी पदवीस्तरावरील द्वितीय व तृतीय वर्ष बीए, बीकॉम, बीएस्सी आयटी व बीएस्सी कॉम्पुटर सायन्स या अभ्यासक्रमासाठी व पदव्युत्तर भाग २ एमए, एमए – शिक्षणशास्त्र, एमकॉम, एमएससी (गणित, आयटी व कॉम्पुटर सायन्स) व एमसीए (द्वितीय व तृतीय वर्ष) आणि पदव्युत्तर एक वर्षाचे व्यवस्थापन पदविका पीजी डीएफएम व पीजी डीओआरएम या अभ्यासक्रमाचे ऑनलाईन प्रवेश ८ सप्टेंबरपासून सुरु करण्यात आले आहेत. प्रथम वर्ष बीए, बीकॉम, बीएस्सी आयटी व भाग १ एमए, एमए – शिक्षणशास्त्र, एमकॉम, एमएससी (गणित व आयटी) व एमसीए प्रथम वर्ष या अभ्यासक्रमाचे प्रवेश युजीसी-डीईबीने प्रवेशाचे वेळापत्रक जाहीर केल्यानंतर करण्यात येतील.

मागील वर्षी आयडॉलमध्ये ६७,२३७ विद्यार्थ्यांनी प्रवेश घेतला होता. यामध्ये २६,१७१ विद्यार्थी होते, तर ४१,०६६ विद्यार्थिनी होत्या. विद्यार्थ्यांपेक्षा विद्यार्थिनीची संख्या सर्वाधिक होती. विद्यार्थ्यांच्या सुविधेसाठी ठाणे, कल्याण व रत्नागिरी या विद्यापीठाच्या उपकेंद्रावर आयडॉलच्या विद्यार्थ्यांना अध्ययन साहित्याचे वितरण केले जाते. तसेच त्यांना मार्गदर्शनही केले जाते. आयडॉलच्या प्रवेशाची सर्व अद्ययावत माहिती विद्यापीठाचे संकेतस्थळ, आयडॉलचे फेसबुक पेज व ट्विटरवर उपलब्ध करून देण्यात आलेली आहे. याव्यतिरिक्त विद्यार्थ्यांसाठी [email protected] हा ईमेल उपलब्ध करून देण्यात आलेला आहे.