मुख्यमंत्री परीस तर गिरीश महाजन… – ऐका अजित पवारांचे तुफान भाषण

अर्थसंकल्पिय अधिवेशनाच्या दुसऱ्या आठवड्यात आज विधानसभेच्या विरोधी पक्षनेतेपदी काँग्रेसचे गटनेते विजय वडेट्टीवार यांची घोषणा करण्यात आली. त्यानंतर त्यांच्या अभिनंदनपर केलेल्या भाषणात अजित पवार यांनी सत्ताधाऱ्यांना चांगल्याच कोपरखळ्या मारल्या. विरोधी पक्षनेतेपदी एकनाथ खडसे यांनी चांगले काम केले होते. पण सरकार आल्यानंतर फक्त एक वर्ष त्यांच्याकडे मंत्रीपद होते. त्यानंतर क्षुल्लक चौकशीच्या कारणास्तव त्यांना डावलण्यात आले. पुन्हा त्यांना मंत्रीपद देण्यात आले नाही. यातले वास्तव फक्त मुख्यमंत्री आणि त्यांनाच माहीत? अशी प्रतिक्रिया देत असताना अजित पवार यांनी गिरीश महाजन यांच्यावरही चांगलीच टिप्पणी केली.

गिरीश महाजन यांचे सोने झाले

अजित पवार एकनाथ खडसे यांच्यावर बोलत असताना गिरीश महाजन हे आता पुढे पुढे दिसत आहेत, असा शेरा काही आमदारांनी मारला. त्यानंतर अजित पवार म्हणाले की, गिरीश महाजन काहीच नाहीत. मुख्यमंत्री परिस आहेत. या परिस स्पर्शामुळे गिरीश महाजन यांचे सोने झाले. अजित पवार यांनी ही टिप्पणी केली तेव्हा गिरीश महाजन सभागृहात हजर नव्हते. मात्र मुख्यमंत्र्यांसहीत सर्वच सत्ताधारी आमदारांनी त्याला हसून दाद दिली. त्यामुळे खरंच गिरीश महाजनांचा उद्धार हा मुख्यमंत्र्यांच्या जवळीकीमुळे झाली की काय? असे चित्र दिसत होते.

वडेट्टीवारांनी २०-२० गेम खेळावा

विजय वडेट्टीवार यांना विरोधी पक्षनेते म्हणून फक्त ६ दिवसांचा कालावधी मिळाला आहे. त्यामुळे कसोटी आणि वन डे न खेळता त्यांनी कमी कालावधीत २०-२० गेम खेळावा, असे सांगितले. राजकारणात वरिष्ठ सांगितल ती जबाबदारी पार पाडावी लागते. कधीकधी नको त्या ठिकाणीही जाऊन बसावे लागते. विजय वडेट्टीवार यांनी चांगले काम करावे. काही लोक अधिवेशन संपल्यानंतर रथयात्रा की जत्रा काढणार आहेत. त्यांना तोडीस तोड उत्तर देण्यासाठी वडेट्टीवार यांनी देखील राज्यव्यापी दौरा करावा, असेही अजित पवार पुढे म्हणाले.