राज्यात गेल्या आठवड्यात झालेल्या अवकाळी पावसामुळे शेतीचे मोठ्या प्रमाणात नुकसान झाले आहे. अनेक भागांमध्ये हाताशी आलेली पिकं खराब झाली आहेत. अशात शेतकरी हवालदील झाला आहे. त्याला धीर देण्यासाठी काल, रविरवारी राष्ट्रवादी काँग्रेसचे अध्यक्ष शरद पवार यांनी उस्मानाबाद येथील नुकसानग्रस्त भागांचा पाहणी दौरा केला होता. तर आज, सोमवारी मुख्यमंत्री उद्धव ठाकरे सोलापूर दौऱ्यावर जाणार आहेत. मुख्यमंत्री सांगवी, अक्कलकोट येथील नुकसानग्रस्त शेतकऱ्यांशी संवाद साधणार आहेत. तसेच सोलापूरनंतर ते बुधवारी, २१ ऑक्टोबर रोजी उस्मानाबाद जिल्ह्याचाही दौरा करणार असल्याचे सांगितले जात आहे. याबाबतची माहिती मुख्यमंत्री सचिवालयाच्या जनसंपर्क कक्ष विभागाकडून देण्यात आली आहे.
असा असेल मुख्यमंत्र्यांचा दौरा
सोमवारी सकाळी मुख्यमंत्री मुंबईतील त्यांच्या मातोश्री निवासस्थानावरुन सोलापूरला रवाना होतील. सकाळी ९ वाजता सोलापूर विमानतळावर पोहोचतील. त्यानंतर सकाळी सव्वा दहा वाजता उस्मानाबाद जिल्ह्यातील तुळजापूर तालुक्यातील काटगाव आणि अपसिंगा येथे अतिवृष्टीमुळे पडझड झालेल्या घरांची पाहणी करतील. तसेच शेती पिकांच्या नुकसानीची ते पाहणी करतील. त्यानंतर तुळजापूर येथील शासकीय विश्रामगृह येथे पूरपरिस्थितीबाबत लोकप्रतिनिधी, अधिकारी यांच्याशी चर्चा करतील. त्यानंतर दुपारी १.४५ वाजता मुंबईकडे जाण्यासाठी ते सोलापूरच्या दिशेने रवाना होतील. दरम्यान, नुकसानग्रस्त भागासाठी मुख्यमंत्री काही महत्त्वाच्या घोषणा करण्याची शक्यता आहे.
हेही वाचा –
माजी मुख्यमंत्र्यांची जीभ घसरली, भाजपच्या महिला उमेदवाराला म्हणाले आयटम!
