Thursday, August 6, 2020
Mumbai
26 C
घर ट्रेंडिंग तिजोरीत खडखडाट, मंत्र्यांवर गाड्यांची उधळपट्टी

तिजोरीत खडखडाट, मंत्र्यांवर गाड्यांची उधळपट्टी

कोरोनामुळे राज्याच्या तिजोरीत खडखडाट झाला असल्याने कर्मचार्‍यांचे वेतन देण्यासाठी राज्य सरकारवर कर्ज घेण्याची वेळ आली आहे. मात्र शिक्षणमंत्री, क्रीडा मंत्र्यांच्या गाड्या खरेदीसाठी मुख्यमंत्री उद्धव ठाकरे यांनी तब्बल 1 कोटी 37 लाख रुपये मंजूर केले आहेत.

Mumbai

कोरोनामुळे राज्याच्या तिजोरीत खडखडाट झाला असल्याने कर्मचार्‍यांचे वेतन देण्यासाठी राज्य सरकारवर कर्ज घेण्याची वेळ आली आहे. मात्र शिक्षणमंत्री, क्रीडा मंत्र्यांच्या गाड्या खरेदीसाठी मुख्यमंत्री उद्धव ठाकरे यांनी तब्बल 1 कोटी 37 लाख रुपये मंजूर केले आहेत. जनतेचे सेवक असल्याचा दावा करत सत्ता स्थापन करणार्‍या उद्धव ठाकरे यांच्याकडून मंत्र्यांवर केलेली उधळपट्टीबाबत आश्चर्य व्यक्त केले जात आहे.

शुक्रवारी शासनाच्या अध्यादेशात हा निर्णय घेण्यात आला आहे. राज्यामध्ये तीन महिन्यांपासून कोरोनाने थैमान घातले आहे. कोरोनामुळे केलेल्या लॉकडाऊनमुळे उद्योगधंदे बंद पडले असून, सर्व व्यवहार ठप्प झाले आहेत. अशामध्ये राज्य सरकारचे उत्पन्न ही बंद झाले आहे. कोरोना रुग्णांना वैद्यकीय सेवा उपलब्ध करून देणे, स्थलांतरित मजुरांच्या जेवणाची सोय, क्वारंटाईन झालेल्या नागरिकांची सोेय करणे, वैद्यकीय सामग्री खरेदी करणे, कोरोना चाचण्या करणार्‍या प्रयोगशाळा उभारणे अशा महत्त्वाच्या कामांमध्ये सरकारचा पैसा मोठ्या प्रमाणात खर्च होत आहे. त्यामुळे सरकारी तिजोरीत खडखडाट झाला असल्याने सरकारी कर्मचार्‍यांचे वेतन देण्यासाठीही सरकारकडे पैसे नाहीत. त्यामुळे वेतन देण्यासाठी कर्ज घेण्याची वेळ ठाकरे सरकारवर आली आहे. असे असतानाही मुख्यमंत्री उद्धव ठाकरे यांनी शालेय शिक्षणमंत्री वर्षा गायकवाड, क्रीडा व युवक कल्याण मंत्री सुनील केदार, शालेय शिक्षण राज्यमंत्री बच्चू कडू, क्रीडा राज्यमंत्री आदिती तटकरे व स्टाफ कर्मचार्‍यांच्या वापरासाठी एक अशा सहा गाड्या खरेदी करण्यास मुख्यमंत्री उद्धव ठाकरे यांनी मंजुरी दिली आहे. इनोव्हा क्रिस्टा 2.4 झेडएक्स (7 एसटीआर) ही गाडी खरेदी करण्यासाठी तब्बल 22 लाख 83 हजार रुपयांना मंजुरी देण्यात आली आहे. सहा इनोव्हा क्रिस्टा खरेदी करण्यास वित्त विभागाकडून मंजुरी मिळाल्याने तब्बल 1 कोटी 37 लाख रुपये गाडी खरेदीसाठी मंजूर करण्यात आले आहेत. इनोव्हा क्रिस्टा या गाडीची किंमत 20 लाखांपेक्षा अधिक असल्याने ‘विशेष बाब’ सदराखाली शालेय शिक्षण मंत्र्यांच्या गाडीला वित्त विभागाच्या राज्यस्तरीय वाहन आढावा समिती आणि मुख्यमंत्र्यांनी मान्यता दिली आहे. हा खर्च 2020-21 या आर्थिक वर्षाच्या मंजूर अनुदानातून भागावण्याचे आदेशही शालेय शिक्षण व क्रीडा विभागाकडून काढलेल्या अध्यादेशात देण्यात आले आहेत.
एकीकडे कर्मचार्‍यांना वेतन देणे सरकारला मुश्किल झाले तसेच शाळेतील शिक्षकांनाही काही महिन्यांपासून वेतन मिळत नसल्याने त्यांच्यावर उपासमारीची वेळ आली आहे. असे असताना मंत्र्यांच्या गाड्यांवर सरकारकडून कोट्यवधीची उधळपट्टी करण्यात येत असल्याबद्दल आश्चर्य व्यक्त करण्यात येत आहे.