पुणे रेल्वे स्टेशनजवळ उभ्या असलेल्या रेल्वे बोगीत एका अडीच वर्षीय मुलीवर बलात्कार झाल्याची संतापजनक घटना उघडकीस आली आहे. सोमवारी रात्री आपल्या आईसह ती मुलगी फूटपाथवर झोपली होती. त्यावेळी एका नराधमाने तिचे अपहरण करून तिच्यावर पाशवी बलात्कार केला. मंगळवारी सकाळी ती मुलगी बेशुध्दावस्थेत आढळून आली.तिला उपचारासाठी ससून हॉस्पिटलमध्ये दाखल करण्यात आले. मात्र उपचारादरम्यान तिचा मृत्यू झाला. दरम्यान, याप्रकरणी बंडगार्डन पोलिसांनी रात्री उशीरा गुन्हा दाखल केला असून एका संशयिताला ताब्यात घेण्यात आले आहे. त्याची चौकशी सुरु असल्याची माहिती पोलिसांकडून देण्यात आली आहे.
पुणे रेल्वे स्टेशनजवळील फूटपाथवर ती अडीच वर्षांची मुलगी आणि आपल्या आईवडिलांसह रहात होती. तिचे आईवडिल खेळणी आणि इतर साहित्य विकून आपला उदरनिर्वाह करत होते. हे कुटुंब मूळचे बारामती येथून आले होते. त्या मुलीची आई ही मूकबधिर असून तिचे दोन विवाह झालेले आहेत. ही मुलगी पहिल्या पतीपासून झालेली असून सोमवारी रात्री ती मालधक्का चौकातील फुटपाथवर मुलीसह झोपली होती. मंगळवारी पहाटे पाचच्या सुमारास अनोळखी व्यक्तीने मुलीला उचलून नेले. मुलीच्या आईला जाग आल्यानंतर त्यांनी शोध घेण्यास सुरुवात केली. परंतु त्यांना अपयश आले.
पोलिसांनी दिलेल्या माहितीनुसार लोहमार्ग पोलिसांना पुणे रेल्वे स्थानक परिसरात गस्त घालत असताना रेल्वेच्या डब्यामध्ये मुलगी बेशुद्ध अवस्थेत आढळून आली. तिच्या अंगावर जखमा होत्या. लोहमार्ग पोलिसांनी तिला उपचारासाठी तात्काळ हॉस्पिटलमध्ये दाखल करून तिच्या पालकांचा शोध घेतला. मालधक्का चौकात पोलिसांकडून तपास सुरू असताना मुलीच्या आई-वडिलांनी मुलीचे छायाचित्र ओळखले. पोलिसांनी त्यांना मुलीवर उपचार सुरू असल्याचे सांगितले. मात्र उपचार सुरू असताना सायंकाळी साडे पाचच्या सुमारास या मुलीचा मृत्यू झाला. याप्रकरणी लोहमार्ग पोलिसांनी अकस्मात मृत्यूची नोंद करून हे प्रकरण बंडगार्डन पोलिसांकडे वर्ग केलं आहे. या घटनेची माहिती मिळताच बंडगार्डन पोलीस व वरिष्ठ अधिकार्‍यांनी घटनास्थळी धाव घेतली. दरम्यान, याप्रकरणी लोहमार्ग पोलिसांनी एका संशयिताला ताब्यात घेतले आहे, अशी माहिती लोहमार्ग पोलिस ठाण्याचे वरिष्ठ निरीक्षक सुरेशसिंग गौड यांनी दिली.
