आज २३ मे म्हणजेच ' वर्ल्ड टर्टल डे'. गेल्या काही वर्षांपासून सागरी कासवांची संख्या कमी होत असल्याचे निदर्शनास आले आहे. ही बाब लक्षात घेत २००२ सालापासून कासव संवर्धनाची मोहिम अनेक संस्थांनी हाती घेतली. या मोहिमेनंतर आता कासवांच्या संख्येत लक्षणीय वाढ झाली आहे. २००२ सालापासून अनेक समुद्रकिनाऱ्यावर 'कासव महोत्सव' भरवला जातो. या महोत्सवाला पर्यटकांची तुफान गर्दी असते.
कोकण किनारपट्टीवरील वाळू ऑलिव्ह रिडलेसाठी अनुकूल असल्यामुळे कोकणातील अंजर्ले, मंडणगड, केळशी, वेळास या ठिकाणी या कासवांची गर्दी असते.
साधरण नोव्हेंबर ते मार्च हा विणीचा हंगाम असतो. या कालावधीत कासवे समुद्र किनाऱ्यावर येतात.
मादी कासवे सागरी किनाऱ्याच्या वाळूमध्ये उंच लाटांच्या पातळीपासून ५० ते १०० फूट अंतरात एक ते दीड फूट खोलीचा खड्डा खोदून त्यामध्ये एकावेळी १०० ते १५० अंडी घालतात.
अंडी घातल्यावर मादी कासवे खड्ड्यात वाळू भरून समुद्रात निघून जातात आणि साधारण मार्च महिन्यात या अंड्यातून कासवाची गोंडस पिल्ले बाहेर येतात. या अंड्यांची उबवण, त्यातून पिलांची निर्मिती आणि जन्मलेली पिले समुद्रात जाणे ही सर्व प्रक्रिया निसर्गावर अवलंबून असते.
