भारताच्या साई प्रणितने जागतिक बॅडमिंटन स्पर्धेच्या उपांत्यपूर्व फेरीत प्रवेश केला आहे. पुरुष एकेरीच्या तिसर्‍या फेरीत १६ व्या सीडेड प्रणितने सहाव्या सीडेड इंडोनेशियाच्या अँथनी सिनीसुका गिंटिंगवर २१-१९, २१-१३ अशी सरळ गेममध्ये मात केली. पुरुष एकेरीच्या तिसर्‍या फेरीत एच.एस.प्रणॉयला मात्र पराभवाचा सामना करावा लागला. त्याला अव्वल सीडेड जपानच्या केंटो मोमोटाने २१-१९, २१-१२ असे पराभूत केले. मागील सामन्यात चीनचा महान खेळाडू लिन डॅनवर मात करणार्‍या प्रणॉयने मोमोटाला पहिल्या गेममध्ये चांगली झुंज दिली. दुसर्‍या गेममध्ये मात्र त्याने निराशाजनक खेळ केला. त्यामुळे मोमोटाने दुसरा गेम ९ गुणांच्या फरकाने जिंकला.
अँथनी सिनीसुका गिंटिंगविरुद्धच्या सामन्याची प्रणितने चांगली सुरुवात केली. त्यामुळे पहिल्या गेमच्या मध्यंतराला त्याच्याकडे ११-८ अशी आघाडी होती. मात्र, मध्यंतरानंतर गिंटिंगने त्याच्या खेळात सुधारणा केली. त्याने आक्रमक खेळ करत पहिल्या गेममध्ये १३-१३ अशी बरोबरी केली आणि नंतर १७-१५ अशी आघाडी मिळवली. परंतु, प्रणितने पुनरागमन करत १९-१९ अशी बरोबरी केली. प्रणितनेच पुढील २ गुण मिळवत पहिला गेम २१-१९ असा जिंकला. दुसर्‍या गेमच्या सुरुवातीपासूनच प्रणितने वर्चस्व प्रस्थापित करत ४-० अशी आघाडी घेतली.
मात्र, त्याची ही आघाडी फारकाळ टिकली नाही. गिंटिंगने दमदार पुनरागमन केले आणि मध्यंतराला ११-८ अशी आघाडी मिळवली. मध्यंतरानंतर प्रणितने उत्कृष्ट खेळ केला. त्याने पुढील १३ पैकी १२ गुण मिळवले. त्यामुळे त्याला २०-१२ अशी आघाडी मिळाली. यानंतर त्याने अप्रतिम स्मॅश मारत हा गेम २१-१३ असा जिंकत स्पर्धेत आगेकूच केली.
