विधानसभा निवडणुकीच्या पार्श्वभूमीवर मागच्या दोन आठवड्यांपासून चाललेला प्रचार आता थंडावला आहे. आज बारामती येथे पवार कुटुंबियांनी परंपरेनुसार शेवटची सभा घेत प्रचाराला पुर्णविराम दिला. यावेळी बोलताना सुप्रिया सुळे म्हणाल्या की, “सातारा येथे भाषण करताना पवार साहेबांनी दिल्लीचे तख्तच काय तर कुणालाही घाबरत नसल्याचा इशारा दिलाय. आज हिमालयासमोर जर कुणी ठामपणे उभा असेल तर माझा सह्याद्री उभा आहे आणि त्या सह्याद्रीचे नाव शरद पवार आहे”
…अरे ते माझेही बाप आहेत
तत्पुर्वी इंदापूर येथील सभेत तरुणांनी पवारांना उद्देशून “कोण आला रे, कोण आला, मोदी-शाहाचा बाप आला” अशी घोषणाबाजी केली होती. त्यावर सुप्रिया सुळेंनी मिश्किल टिप्पणी केली की, “तुम्ही घोषणा देताय, पण ते माझेही बाप आहेत हे विसरु नका.”
विधानसभा निवडणुकीत काँग्रेस-राष्ट्रवादीचे सरकार आल्यास सर्वात आधी ते महापोर्टल आम्ही बंद करु आणि कै. आर. आर. पाटील यांच्यासारखी जशी भरती सुरु केली होती. तशीच भरती पुन्हा सुरु करुन तरुणांना नोकरी देण्याचे काम करु, अशी ग्वाही सुप्रिया सुळे यांनी आज आपल्या भाषणात दिली. या भाषणाची क्लिप देखील त्यांनी आपल्या ट्विटरवर अपलोड केली आहे.
विधानसभेत आता महाआघाडीची सत्ता येणार आहे. आपली सत्ता आली की पहिलं ते फसवे महापोर्टल बंद करु. स्व. आर. आर. पाटील आबांनी जशी भरती केली होती त्याचप्रमाणे तरुणांना नोकरी देण्याचं काम आपण करु. pic.twitter.com/MFBr9XF7Fi
— Supriya Sule (@supriya_sule) October 19, 2019
