Live Corona Update: ‘ग्रीन झोनमधील निर्बंध अधिक शिथिल केले जाणार’

लॉकडाऊनचा चौथा टप्पा आजपासून सुरु होत आहे. या चौथ्या टप्प्यात केंद्रीय गृहमंत्रालयाने राज्यांना जास्तीचे अधिकार दिले आहेत. त्यानुसार महाराष्ट्रात लॉकडाऊन कसा असेल? याबाबत खुद्द मुख्यमंत्री उद्धव ठाकरे आज माहिती देणार आहेत. आजच उद्धव ठाकरे यांची आमदार म्हणून निवड झालेली आहे. त्यामुळे आज ते काय बोलतात, याकडे सर्वांचे लक्ष असेल.

बीड जिल्ह्यात कोरोना व्हायरसने पहिला मृत्यू झाला आहे. तर औरंगाबादमध्ये ६५ वर्षीय वृद्धाचा मृत्यू झाल्यामुळे मराठवाड्यात चिंतेचे वातावरण आहे. औरंगाबाद येथील मृतांची संख्या आता ३२ वर पोहोचली आहे. बीडमध्ये काही दिवसांपूर्वी कोरोनाबाधितांची संख्या शून्यावर होती. मात्र अहमदनगर जिल्ह्यातील पिंपळगाव कौडा येथील रहिवासी बीडच्या आष्टी तालुक्यात आपल्या नातेवाईकांच्या घरी राहायला आली होती. तिथे तब्येत खराब झाल्यानंतर त्यांच्यावर उपचार सुरु झाले. मात्र या महिलेचा रिपोर्ट पॉझिटिव्ह आला. त्यानंतर उपचार सुरु असताना आज पहाटे या महिलेचे निधन झाले.

महाराष्ट्र असोसिएशन ऑफ रेसिडन्ट डॉक्टर्स (MARD) यांनी राज्याचे मुख्यमंत्री उद्धव ठाकरे यांना एक पत्र लिहिले असून त्यात आठ दिवसांच्या ड्युटीनंतर सहा दिवसांचा क्वारंटाईन पिरियडसाठी सुट्टी देण्यात यावी, अशी मागणी केली आहे. शनिवारी महानगरपालिकेने पाच दिवसांची ड्युटी आणि दोन दिवसांचा क्वारंटाईन करण्यासाठी सुट्टी निश्चित केली होती. मात्र ही मागणी डॉक्टरांना मान्य नाही. तसेच डॉक्टरांना आरोग्य विमा सरंक्षण आणि २५ हजारांची वेतन वाढ हवी आहे.

मुंबई ते गोवा असा ट्रेनने प्रवास करणारे आणखी दोन प्रवासी कोरोना पॉझिटिव्ह आढळले आहेत. ट्रूनॅट टेस्टिंगदरम्यान त्यांना संसर्ग झाल्याचे समोर आले. आता एकूण नऊ प्रवाशी पॉझिटिव्ह असल्याचे समोर आले आहे. कोरोनामुक्त झालेल्या गोव्यात आता ३१ नवे पॉझिटिव्ह रुग्ण आढळले आहेत.

कोरोना व्हायरसचा संसर्ग रोखण्यासाठी देशभरात लॉकडाऊन वाढविण्यात आला आहे. आता ३१ मे पर्यंत आणखी लॉकडाऊन असणार आहे. भारतात आतापर्यंत कोरोनाबाधितांची संख्या ९५ हजार ६९८ झाली असून यापैकी ५५ हजार ८७२ केसेस अॅक्टिव्ह आहेत. तर ३६ हाजर ७९५ रुग्णांनी कोरोनावर यशस्वीरित्या मात केली आहे. मात्र दुर्दैवाने भारतातील कोरोनाबाधितांच्या मृत्यूंनी आता ३ हजारांचा आकडा पार केला असून ही संख्या आता ३,०२५ वर पोहोचली आहे.