आझमगड – उत्तर प्रदेशातील आझमगड जिल्हा कारागृहात १० कैद्यांना एचआयव्हीची लागण झाल्याचे आढळून आल्याने खळबळ उडाली आहे. हे सर्व कैदी इटौरा येथील जिल्हा कारागृहात आहेत. त्याचबरोबर इतर कैद्यांच्या तपासाची प्रक्रिया सुरू आहे. आरोग्य विभागाने त्याचा अहवाल कारागृह प्रशासन आणि सरकारला दिला आहे. कारागृह प्रशासन या कैद्यांचा इतिहास जाणून घेण्याचा प्रयत्न करत आहे.
आझमगड जिल्ह्यातील इटौरा येथे बांधण्यात आलेल्या नवीन हायटेक जेलमध्ये न्यायालयाच्या आदेशानुसार कैद्यांची एचआयव्ही चाचणी केली जात आहे. जेणेकरून किती कैदी एचआयव्ही बाधित आहेत हे कळू शकेल. सध्या कारागृहात एकूण 2500 कैदी आहेत. ज्यामध्ये महिला आणि पुरुष कैद्यांचा समावेश आहे. कारागृहात सुरू असलेल्या एचआयव्ही चाचणी प्रक्रियेत कैदी सहभागी होण्यास इच्छुक नसल्याचे सांगण्यात आले. आतापर्यंत निम्म्या कैद्यांची तपासाची प्रक्रिया झाली आहे. ज्यामध्ये एकूण 10 एचआयव्ही बाधित कैदी आढळून आले आहेत.
1322 कैद्यांची तपासाची प्रक्रिया झाली पूर्ण –
आरोग्य विभागाच्या आकडेवारीनुसार, 2500 कैद्यांपैकी आतापर्यंत एकूण 1322 कैद्यांची चौकशी करण्यात आली आहे. ज्यामध्ये दहा कैदी पॉझिटिव्ह आले आहेत. पाच कैद्यांना एचआयव्ही असल्याची पुष्टी झाली आहे. तर 5 कैद्यांच्या कन्फर्मेशन चाचणीसाठी दुसऱ्यांदा चाचणी प्रयोगशाळेत पाठवण्यात आली आहे. कारागृह प्रशासन त्यांच्या अहवालाची वाट पाहत आहे. सध्या कारागृह प्रशासनात खळबळ उडाली आहे. लोकांमध्ये कुजबुज सुरूच आहे. 10 जणांमध्ये एचआयव्हीचा संसर्ग कसा पसरला याची चर्चा सुरू आहे.
