2008 च्या मुंबई दहशतवादी हल्ल्यातील आरोपी तहव्वूर राणाला भारतात आणण्याचा मार्ग मोकळा झाला आहे. अखेर, कॅलिफोर्नियातील अमेरिकन कोर्टाने 2008 च्या मुंबई दहशतवादी हल्ल्याप्रकरणी पाकिस्तानी वंशाचा कॅनडाचा व्यापारी तहव्वूर राणा याला भारताकडे प्रत्यार्पण करण्यास परवानगी दिली आहे. 10 जून 2020 रोजी भारताने 62 वर्षीय राणाला प्रत्यार्पणाच्या उद्देशाने तात्पुरती अटक करण्याची तक्रार दाखल केली. बायडेन प्रशासनाने राणाच्या भारतात प्रत्यार्पणाला पाठिंबा दिला आणि त्याला मान्यता दिली. ( 26/11 accused Tahavur Rana to be extradited to India after 15 years US Court Approval )
कॅलिफोर्निया न्यायालयाचा आदेश
16 मे रोजीच्या 48 पानांच्या आदेशात, कॅलिफोर्नियाच्या सेंट्रल डिस्ट्रिक्टसाठी जिल्हा न्यायालयाच्या न्यायाधीश जॅकलिन चूलजियन यांनी सांगितले की, विनंतीला समर्थन आणि विरोध आणि सुनावणीच्या वेळी सादर केलेल्या युक्तिवादासाठी सादर केलेल्या सर्व कागदपत्रांचे न्यायालयाने पुनरावलोकन केले आणि त्यावर विचार केला. ज्या गुन्ह्यांसाठी त्याच्या प्रत्यार्पणाची विनंती करण्यात आली आहे त्या गुन्ह्यांसाठी ६२ वर्षीय राणा प्रत्यार्पण करण्यायोग्य असल्याचा निष्कर्ष न्यायालयाने काढला आहे, असे न्यायाधीशांनी सांगितले.
भारताच्या विनंतीवरून अमेरिकेत अटक
26 नोव्हेंबर 2008 रोजी मुंबईतील भीषण दहशतवादी हल्ल्यातील त्याच्या भूमिकेसाठी भारताने त्याच्या प्रत्यार्पणाची विनंती केल्यानंतर राणाला अमेरिकेत अटक करण्यात आली. राष्ट्रीय तपास संस्थेने (एनआयए) त्याला राजनैतिक माध्यमांद्वारे भारतात आणण्यासाठी कार्यवाही सुरू करण्यास तयार असल्याचे म्हटले आहे. पाकिस्तानस्थित लष्कर-ए-तैयबाच्या दहशतवाद्यांनी केलेल्या २६/११ च्या हल्ल्यातील राणाच्या भूमिकेची एनआयएकडून चौकशी सुरू आहे.
सुनावणीदरम्यान, अमेरिकन सरकारच्या वकिलांनी युक्तिवाद केला की, राणाला माहित होते की त्याचा बालपणीचा मित्र, पाकिस्तानी-अमेरिकन डेव्हिड कोलमन हेडली हा लष्कर-ए-तैयबामध्ये सामील होता. राणाच्या वकिलांनी त्याच्या प्रत्यार्पणाला विरोध केला आहे.
( हेही वाचा: ठरलं! कर्नाटकला ‘या’ तारखेला मिळणार नवा मुख्यमंत्री; खर्गेंनी सोडवला तिढा )
दहशतवादी हल्ल्यात 166 जणांंनी गमावला होता जीव
मुंबईवर झालेल्या दहशतवादी हल्ल्यात सहा अमेरिकन नागरिकांसह एकूण 166 जणांचा मृत्यू झाला होता. हा हल्ला 10 पाकिस्तानी दहशतवाद्यांनी केले होते. मुंबईतील प्रतिष्ठित आणि महत्त्वाच्या ठिकाणी हे हल्ले 60 तासांहून अधिक वेळ सुरू होते. भारत आणि अमेरिका यांच्यात प्रत्यार्पण करार आहे. राणाचे भारताकडे प्रत्यार्पण हे पूर्णपणे कराराच्या अधिकारक्षेत्रात होते, असा निकाल न्यायाधीशांनी दिला. या हल्ल्यांमध्ये अजमल कसाब नावाचा दहशतवादी जीवंत पकडला गेला होता. त्याला 21 नोव्हेंबर 2012 रोजी भारतात फाशी देण्यात आली होती. या हल्ल्यादरम्यान उर्वरित दहशतवादी भारतीय सुरक्षा दलांनी मारले होते.
