नवी दिल्ली : CBSE ने डिसेंबर 2024 सत्रासाठी घेतलेल्या केंद्रीय शिक्षक पात्रता चाचणी (CTET) चा निकाल जाहीर झाला आहे. उमेदवार ctet.nic.in या लिंकवर जाऊन आपला निकाल पाहू शकतात. 14 आणि 15 डिसेंबर 2024 ला CBSE CTET म्हणजेच केंद्रीय शिक्षक पात्रता परीक्षा घेण्यात आली होती. सीटीईटी परीक्षेची उत्तरपत्रिका 01 जानेवारी 2025 रोजी प्रसिद्ध करण्यात आली आणि उमेदवारांना त्यांचे आक्षेप नोंदवण्यासाठी 05 जानेवारी 2025 पर्यंत वेळ देण्यात आला. सीटीईटी विद्यार्थ्यांचे गुणपत्रक आणि पात्रता प्रमाणपत्रे देखील लवकरच डिजीलॉकरवर अपलोड केली जातील. उमेदवार डिसेंबर-2024 च्या CTET च्या ऑनलाइन अर्जात दिलेल्या मोबाईल नंबरचा वापर करून ते डाउनलोड करू शकतात. (CBSE CTET Result 2024 Declared Central Teacher Eligibility Test)
सीबीएसई दरवर्षी दोनदा सीटीईटी परीक्षा घेते. पहिली परीक्षा जुलै महिन्यात आणि दुसरी परीक्षा डिसेंबर महिन्यात घेतली जाते. सीटीईटी पेपर-1 मध्ये बसलेल्या यशस्वी उमेदवारांना इयत्ता 1 ली ते 5 वीसाठी शिक्षक भरतीसाठी पात्र मानले जाईल. तर पेपर-2 मध्ये यशस्वी उमेदवारांना इयत्ता 6 वी ते 8 वी साठी शिक्षक भरतीसाठी पात्र मानले जाईल. ही परीक्षा उत्तीर्ण झालेले उमेदवार देशभरातील केंद्रीय विद्यालय, नवोदय विद्यालय आणि लष्करी शाळांमध्ये शिक्षक म्हणून नियुक्तीसाठी अर्ज करू शकतात.
असा पाहा निकाल…
- उमेदवारांनी प्रथम अधिकृत वेबसाइट ctet.nic.in ला भेट द्यावी.
- यानंतर उमेदवारांना होम पेजवर दिलेल्या ‘CTET निकाल 2024’ या लिंकवर क्लिक करावे लागेल.
- आता उमेदवाराला लॉग इन करण्यासाठी त्यांचा परीक्षा क्रमांक टाकावा लागेल आणि सबमिट वर क्लिक करावे लागेल.
- यानंतर उमेदवाराचा निकाल स्क्रीनवर पाहता येईल.
- उमेदवाराने निकालात लिहिलेली सर्व माहिती काळजीपूर्वक वाचावी.
- यानंतर उमेदवार त्यांचा निकाल डाउनलोड करू शकतात.
- उमेदवार त्यांच्या निकालाची प्रिंटआउट देखील घेऊ शकतात.
सीटीईटी परीक्षा उत्तीर्ण होण्यासाठी, कोणत्याही उमेदवाराला किमान पात्रता गुण मिळवणे आवश्यक आहे. सामान्य श्रेणीतील विद्यार्थ्यांनी परीक्षेत किमान 60 टक्के (90 गुण) गुण मिळवणे आवश्यक आहे. तर ओबीसी, एससी आणि एसटी प्रवर्गातील विद्यार्थ्यांसाठी किमान गुण 55 टक्के (82 गुण) मिळवणे आवश्यक आहे. जुलैमध्ये एकूण 8,30,242 उमेदवारांनी सीटीईटी पेपर-1 साठी नोंदणी केली होती, त्यापैकी 6,78,707 उमेदवारांनी परीक्षा दिली. यामध्ये 1,27,159 उत्तीर्ण झाले होते. तर सीटीईटी पेपर-2 साठी 16,99,823 उमेदवारांनी नोंदणी केली होती, त्यापैकी 14,07,332 उमेदवारांनी परीक्षा दिली. यामध्ये 2,39,120 उमेदवार उत्तीर्ण झाले आहेत.