राजधानी दिल्लीत २ मराठी बहिणींची हत्या!

दिल्लीमध्ये वास्तव्याला असलेल्या एका मराठी कुटुंबात दुहेरी हत्याकांड घडल्याचा प्रकार उघडकीस आला आहे. हत्या झालेल्या दोघीही सख्ख्या बहिणी असून आशा पाठक आणि उषा पाठक अशी त्यांची नावं आहेत. दिल्लीतील पश्चिम विहार परिसरातल्या आनंदवन सोसायटीत हे दुहेरी हत्याकांड घडले. आशा आणि उषा यांची त्यांच्या राहत्या घरीच हत्या करण्यात आल्यामुळे स्थानिकांमध्ये खळबळ माजली आहे. आशा आणि उषा याचं वय अंदाजे ७० ते ७५ वर्ष होतं. तसंच या दोघीही अविवाहित असल्याची माहिती पोलीस तपासात समोर आली आहे. आनंदवन सोसायटीमध्ये पाठक भगिनी एकाच घरात राहत होत्या. एक बहिण ग्रंथपाल म्हणून काम करत होती, तर दुसरी शिक्षीका होती. दरम्यान, पाठक भगिनांना मारणाऱ्या अज्ञात आरोपींनी घरातील दागिने आणि किंमती वस्तू चोरल्याचे समोर आले आहे. त्यामुळे चोरीच्या उद्देशातूनच हे दुहेरी हत्याकांड झाल्याचा अंदाज वर्तवला जात आहे.