बदलत्या काळाप्रमाणे सिगारेटचे अनेक प्रकार समोर येत आहेत. यामध्ये ई-सिगरेटचा वापर तरुणांमध्ये मोठ्या प्रमाणात केला जातो. या सिगारेटमुळे आरोग्याला धोका निर्माण होत असून या सिगारेटवर बंदी आणावी अशी याचिका न्यायालयात करण्यात आली होती. याअंतर्गत ई-सिगरेट्सवरचे उत्पादन आणि विक्रीवर बंदी घालण्याचे आदेश दिल्ली न्यायालयाने दिले आहे. या प्रकरणी पुढील सुनावणी १७ मे रोजी ठेवण्यात आली आहे. ई-सिगरेट्स प्रकृतीस अपाय कारक असल्यामुळे हा निर्णय घेण्यात आला आहे. दिल्ली उच्च न्यायालयाचे न्यायमूर्ती विभू बखरु यांनी हे आदेश दिले आहेत. तंबाखूमुळे कर्करोग होण्याची शक्यता असते यामुळे ई-सिगरेट्सचा पर्याय काढण्यात आला होता. मात्र ई-सिगरेटही आरोग्याला अपायकारक असल्याचे सांगितले जात आहे.
काय आहे व्हेपिंग
ई-सिगरेट्स ओढण्यामुळे आरोग्याला निर्माण होणारा धोका धूम्रपानाच्या तुलनेत ५ टक्क्यांहून अधिक नाही हे ई-सिगरेट्सबद्दलच्या वाढत्या सार्वमतातून स्पष्ट होत आहे. याचे प्रमुख कारण म्हणजे धूम्रपानामध्ये असलेले ज्वलन ई-सिगरेट्समध्ये नाही. या ज्वलनामुळेच हानीकारण विषारी वायू व कॅन्सरला कारणीभूत ठरणारे घटक निर्माण होतात. ई-सिगरेट किंवा इलेक्ट्रॉनिक सिगरेट हे एक इलेक्ट्रॉनिक उपकरण आहे. हे उपकरण तंबाखूच्या धूम्रपानामुळे येणारी भावना निर्माण करते. ई-सिगरेट्सच्या वापराला सामान्यपणे “व्हेपिंग” असे म्हटले जाते. ही सिगरेट निकोटिन, प्रॉपिलीन ग्लायकोल, ग्लिसरिन आणि फ्लेवरिंग घटक वापरून तयार केली जाते. २००३ साली चीनमधील औषधकंपनी “हॉन लिक”ने आधुनिक ई-सिगरेटचा शोध लावला.
