नवी दिल्ली : केंद्रीय गृहमंत्री अमित शहा यांनी बुधवारी कॉंग्रेसने त्यांच्यावर केलेल्या आरोपांवरून जोरदार प्रत्युत्तर दिले आहे. घडलेल्या गोष्टी कॉंग्रेस ज्याप्रमाणे तोडून सांगत आहे, ते अत्यंत निंदनीय आहे. तसेच कॉंग्रेस हा संविधान विरोधी पक्ष असून त्यांनीच अनेकदा डॉ. बाबासाहेब आंबेडकरांचा विरोध केल्याचेही ते म्हणाले. (home minister amit shah attacks on congress india alliance over ambedkar row)
‘भारतीय राज्यघटनेचा 75 वर्षांचा गौरवशाली इतिहास’ या विषयावर मंगळवारी चर्चा झाली. या चर्चेत विरोधकांवर तोंडसुख घेत शहा म्हणाले, ‘आंबेडकर… आंबेडकर… आंबेडकर… असे बोलण्याची आता फॅशन झाली आहे. एवढ्या वेळा देवाचे नाव घेतले असते तर सात जन्म स्वर्गात गेले असते.’ शहा यांच्या या विधानावरून विरोधकांनी आक्षेप घेतला आहे. यावर विरोधकांनी जो गदारोळ उठवला त्यानंतर संध्याकाळी अमित शहा यांनी पत्रकार परिषद घेतली आणि विरोधकांच्या आरोपांना प्रत्युत्तर दिले.
हेही वाचा – Congress : डॉ. आंबेडकरांच्या अपमानानंतर काँग्रेस आक्रमक; अमित शहांना रात्री 12 पर्यंत निलंबित करा, त्यानंतर…
राज्यघटनेवरील चर्चेत भाजपच्या वक्त्यांनी राज्यघटनेची रचना आणि राज्यघटनेची मूल्ये यावर तथ्यांच्या आधारे चर्चा केल्याचा दावा शहा यांनी केला. आपले म्हणणे मांडण्यासाठी त्यांनी अनेक उदाहरणे देखील दिली. यातूनच कॉंग्रेस हाच आंबेडकर विरोधी पक्ष असल्याचे सिद्ध होत असल्याचे शहा म्हणाले. यासोबतच त्यांनी कॉंग्रेसवर कायदेशीर कारवाईचा इशारा दिला आहे.
कॉंग्रेसच्या आरोपांना उत्तर देताना केंद्रीय गृहमंत्री अमित शहा म्हणाले की, कॉंग्रेसने सावरकरांचा देखील अपमान केला. तसेच आणीबाणी लादून कॉंग्रेसने राज्यघटनेच्या सगळ्याच मूल्यांना तिलांजली दिल्याचे देखील ते म्हणाले. न्यायपालिकेचा अपमान केला, लष्करातील हुतात्म्यांचा अपमान केला, असेही त्यांनी सांगितले.
कॉंग्रेसने पुन्हा एकदा आपला जुनाच फंडा अवलंबला असल्याचा आरोपही अमित शहा यांनी केला. कोणतेही तथ्य असेल ते तोडून – मोडून सांगायचे आणि एखादी खरी गोष्ट देखील खोटी असल्याचे भासवायचे, हा त्यांचा नेहमीचा कुत्सित प्रयत्न असल्याचे शहा म्हणाले. संसदेतील चर्चेत हे सिद्ध झाले आहे की, बाबासाहेब आंबेडकरांना कॉंग्रेसनेच कशापद्धतीने विरोध केला होता. त्यांच्या निधनानंतरही त्यांनी कशा पद्धतीने त्यांच्यावर अन्याय केला, याचीही माहिती त्यांनी दिली.
हेही वाचा – Aaditya Thackeray : करोडो लोकांना सन्मान देणाऱ्या महामानवाबद्दल किती हा द्वेष; ठाकरेंची भाजपवर टीका
मी अशा पक्षातून आहे जो पक्ष आंबेडकरांचा कधीच अपमान करत नाही. आधी जनसंघ आणि नंतर भारतीय जनता पक्षाने कायमच आंबेडकरांचे सिद्धांत पाळण्याचे काम केले आहे. जेव्हा – केव्हा भाजप सत्तेत आली आहे, तेव्हा त्यांनी आंबेडकरांच्या विचारांचा प्रसार केला. तसेच भाजपमुळेच आरक्षण मजबूत झाल्याचेही ते म्हणाले.
माझं राज्यसभेत जे काही म्हणणं होतं त्याचा विपर्यास करण्यात आला. याआधी देखील असे प्रयत्न झाले आहेत. पंतप्रधान नरेंद्र मोदी यांची अनेक विधाने AI चा वापर करून संपादित करण्यात आली होती. आणि आज माझ्याबाबतीतही तेच करण्यात आल्याचे शहा म्हणाले.
Edited by : Ashwini A. Bhatavdekar
