जगभर थैमान घालणाऱ्या कोरोना विषाणूवर अद्याप लस आलेली नाही. जगातील सर्वच शास्त्रज्ञ लस विकसित करण्यासाठी संशोधन करत आहेत. दरम्यान, इंडियन इम्युनोलॉजिकल लिमिटेड (आयआयएल) या लस उत्पादक कंपनीने कोरोनाची लस विकसित करण्यासाठी संशोधन सुरू केल्याचं जाहिर केलं आहे. लस तयार करणार्‍या आयआयएल कंपनीचे मुख्यालय हैदराबाद येथे आहे. कोरोनाची लस विकसित करण्यासाठी कंपनीने ऑस्ट्रेलियाच्या ग्रिफिथ विद्यापीठाशी करार केला आहे. यासाठी दोघेही एकत्र संशोधन करतील. या महत्त्वपूर्ण करारानुसार आयआयएल आणि ग्रिफिथ युनिव्हर्सिटीमधील वैज्ञानिक अद्ययावत कोडन डी-ऑप्टिमायझेशन तंत्रज्ञानाचा वापर करून कोरोनाची लस विकसित करणार आहेत. या तंत्राद्वारे मानवांमध्ये कोरोना विषाणूविरूद्ध प्रतिकारशक्ती निर्माण करण्यासाठी लस तयार करता येऊ शकते.
हेही वाचा – …तर आर्थिक रसद बंद करु, अमेरिकेची आता WHO ला धमकी
आयआयएलचे व्यवस्थापकीय संचालक डॉ. के. आनंद कुमार म्हणाले की, आयआयएलचे ध्येय लस विकसित करणे आणि पुरवठा करणे हे आहे. कोरोनाची लस विकसित करण्यासाठी कंपनीने हा पुढाकार घेतला आहे. मनुष्य आणि प्राणी यांच्यासाठी सुरक्षित आणि परवडणारी लस तयार करण्याच्या आयआयएलचे नेतृत्व आम्हाला या प्रयत्नात चांगली प्रगती करण्यास सक्षम करेल. कंपनीचे उपव्यवस्थापकीय संचालक डॉ. प्रसन्ना देशपांडे म्हणाले, जगभरात स्वीकारल्या जाणार्‍या विविध पर्यायांचे मूल्यांकन केल्यानंतर आम्ही कोडन डी-ऑप्टिमायझेशन तंत्रज्ञानावर आधारित कोरोनाची लस विकसित करण्याचा निर्णय घेतला आहे.
ऑस्ट्रेलियाच्या ग्रिफिथ युनिव्हर्सिटीचे प्रोफेसर सुरेश महालिंगम म्हणाले की, “या सार्वजनिक आरोग्याच्या संकटाच्या पार्श्वभूमीवर, आम्ही ही लस विकसित करण्यासाठी आयआयएल बरोबर काम करण्यास उत्सुक आहोत. आम्ही एकत्र काम करण्यास सक्षम आहोत.” क्लिनिकल चाचणी घेत असलेल्या झिका व्हायरस लसीच्या संशोधन आणि विकासासाठी आयएलआय आधीपासूनच ग्रिफिथ विद्यापीठासोबत काम करत आहे.
