न्या. रंजन गोगोई: देशाचे ४६ वे सरन्यायाधीश

न्यायमूर्ती रंजन गोगोई यांनी राष्ट्रपती भवन येथे भारताचे मुख्य न्यायाधीश (CJI) म्हणून शपथ घेतली. राष्ट्रपती रामनाथ कोविंद यांच्या उपस्थितीत हा शपथविधी सोहळा पार पडला. गोगोई हे भारताचे ४६ वे सरन्यायाधीश झाले आहेत. याआधीचे सर न्यायाधीश दीपक मिश्रा यांचा कार्यकाळ २ ऑक्टोबर २०१८ रोजी समाप्त झाला असून आजपासून रंजन गोगोई सरन्यायाधीश पदाचा कार्यभार सांभाळणार आहेत. माजी सरन्यायाधीश दीपक मिश्रा यांनीच केंद्र सरकारच्या विधी मंत्रालयाकडे रंजन यांच्या नावाची शिफारीस केली होती. अर्थात औपचारिकरित्या नाव सुचवण्याचा अधिकार सरन्यायाधीशांना असतो. याच अधिकाराचा वापर करत दीपक मिश्रा यांनी गोगोई यांचे नाव सुचवल्याचे समजते. मंगळवारी गांधी जयंतीनिमित्त सरकारी कामांना सुट्टी असल्याकारणाने आज बुधवारी हा शपथविधी सोहळा पार पडला.

Delhi: Justice Ranjan Gogoi sworn-in as the Chief Justice of India (CJI) at Rashtrapati Bhavan. pic.twitter.com/uvjSEVK16Y

— ANI (@ANI) October 3, 2018

न्या. रंजन गोगोई यांच्याकडे सरन्यायाधीश म्हणून १३ महिने १५ दिवसांचा कार्यकाळ असणार आहे. सध्या गोगोई हे न्यायनूर्ती रोहिंटन फली नरिमन यांच्यासह आसामच्या राष्ट्रीय नागरिक नोंदणी उपक्रमाचे निरिक्षण करत आहेत. न्या. गोगोई हे मूळचे आसामचेच असून १८ नोव्हेंबर १९५४ रोजी त्यांचा जन्म झाला होता. त्यांचे वडील हे कॉंग्रेस पक्षाचे ज्येष्ठ नेते आणि आसामचे माजी मुख्यमंत्री होते. जस्टिस गोगोई यांनी १९७८ सालापासून गुहावटी हायकोर्टात वकिल म्हणून आपल्या कारकिर्दीची सुरुवात केली. त्यानंतर २८ फेब्रुवारी २००१ ला त्यांची गुहावटी हायकोर्टाचे न्यायमूर्ती म्हणून नियुक्ती झाली. त्यानंतर सप्टेंबर २०१० मध्ये पंजाब आणि हरियाणा उच्च न्यायालयामध्ये त्यांची न्यायमूर्ती म्हणून बदली करण्यात आली. इथेच त्यांना बढती मिळाली आणि १२ फेब्रुवारी २०११ रोजी ते पंजाब हायकोर्टाचे मुख्य न्यायमूर्ती बनले. २३ एप्रिल २०१२ रोजी गोगोई यांची सर्वोच्च न्यायालयाचे न्यायमूर्ती म्हणून नियुक्ती करण्यात आली.