नवी दिल्लीः मृत्यूपूर्वी रेकॉर्ड केलेला व्हॉईस किंवा व्हिडिओ मेसेज मृत्यूपूर्वी जबाब म्हणून ग्राह्य धरला जाऊ शकतो का?, या मुद्द्यावर सर्वोच्च न्यायालयात याचिका दाखल झाली आहे. ऑनर किलिंगचा तपास कोर्टाच्या देखरेखीखाली व सीबीआयने करावा ही मागणी फेटाळण्याच्या राजस्थान उच्च न्यायालयाच्या निर्णयालाही सर्वोच्च न्यायालयात आव्हान देण्यात आले आहे.
उमा पालिवाल यांनी ही याचिका केली आहे. २७ मे २०२२ रोजी उदयपूर येथील झल्लारा येथे हत्येची घटना घडली होती. या घटनेतील आरोपींवर पुरावे नष्ट करणे व कट रचण्याचा आरोप ठेवण्यात आला होता. येथील एका तरुणीने आंतरजातीय विवाह केला होता. कुटुंबीयांचा विवाहाला विरोध होता. त्यामुळे ते आमची हत्या करु शकतात, अशी शक्यता तरुणीने वर्तवली होती. १० मे २०२२ रोजी कुटुंबीयांनी तरुणीला बेदम मारहाण केली. दुसऱ्या दिवशी तरुणीचा मृतदेह तिच्या कार्यालयात सापडला. मृत्यूपूर्वी तरुणीने एक व्हिडिओ तयार केला होता. तो व्हिडिओ त्या तरुणीने उमा पालिवाल यांना पाठवला होता. ती तरुणी विशाखा संघटनेत कार्यरत होती.
