भारत संयुक्त राष्ट्र सुरक्षा परिषदेच्या (UNSC) विस्ताराची मागणी करताना भारत आपल्या कायम सदस्यत्वाबाबत सातत्याने बोलत आहे. अशातच आता भारत संयुक्त राष्ट्र सुरक्षा परिषदेच्या स्थायी सदस्य आणि भारताचा जवळचा मित्र असलेल्या रशियानेही भारताच्या मागणीला पाठिंबा दिला आहे. मोठी गोष्ट म्हणजे रशियाने चीनमध्ये झालेल्या ग्लोबल पीस फोरममध्ये भारताच्या स्थायी सदस्यत्वाला पाठिंबा दिला आहे.
संयुक्त राष्ट्र सुरक्षा परिषदेच्या विस्तारासाठी भारत आणि ब्राझीलच्या सदस्यत्वावर चर्चा करण्यास तयार असल्याचे रशियाने म्हटले आहे. त्याचवेळी रशियाने कायम सदस्यत्वाच्या मुद्द्यावर जर्मनी आणि जपानला पाठिंबा देण्यास नकार दिला आहे.
रशियाची अधिकृत वृत्तसंस्था टासने दिलेल्या वृत्तानुसार, चीनमधील रशियाचे राजदूत आंद्रे डेनिसोव्ह यांनी सोमवारी १० व्या ग्लोबल पीस फोरममध्ये या गोष्टी सांगितल्या. यासंदर्भात रशियन राजदूत म्हणाले की, ते भारत आणि ब्राझीलच्या सदस्यत्वाचे समर्थन करतात, परंतु, जर्मनी आणि जपानला कायमस्वरूपी जागा देण्याचे कोणतेही कारण दिसत नाही.
दरम्यान, “रशिया सर्वांच्या सहमतीच्या आधारे संयुक्त राष्ट्र सुरक्षा परिषदेचा विस्तार करण्याचे आवाहन करत आहे. संयुक्त राष्ट्र सुरक्षा परिषदेत आफ्रिकन, आशियाई आणि लॅटिन अमेरिकन देशांचा प्रमाणबद्ध वाटा वाढवण्याची गरज आहे. यामुळे युनायटेड नेशन्स अधिक लोकशाही संस्था बनतील आणि जगभरातील लोकांचे विचार समोर येतील”, असे आंद्रे डेनिसोव्ह यांनी म्हटले.
“मी अगदी स्पष्टपणे सांगू इच्छितो की आम्ही UNSC मध्ये जर्मनी आणि जपानसारख्या देशांच्या प्रवेशाला पाठिंबा देण्यास तयार नाही. त्याला स्थायी सदस्यत्व दिल्याने UNSC मध्ये काही फरक पडेल असे आम्हाला वाटत नाही. परिषदेत प्रतिनिधित्वाच्या आधारे जो समतोल आहे, किंवा असमतोल आहे असे म्हणावे, तर ते या दोन देशांच्या (जर्मनी आणि जपान) सदस्यत्वामुळे बळकट होणार नाही. त्याऐवजी, जर हे देश स्थायी सदस्य झाले तर UNSC मधील प्रतिनिधित्व आश्चर्यकारकपणे असमतोल होईल. दुसरीकडे, आम्ही भारत आणि ब्राझीलच्या UNSC मध्ये सामील होण्यास समर्थन करतो”, असे रशियन राजदूत यांनी म्हटले.
“रशियाची इच्छा आहे की खंडातील सर्व देशांना सुरक्षा परिषदेत योग्य रितीने प्रतिनिधित्व मिळावे. ते म्हणाले, ‘आम्ही सातत्याने आवाहन करत आहोत की, शक्य तितक्या सर्वांनी UNSC मध्ये प्रतिनिधित्व केले पाहिजे. सर्व शक्यता असूनही, यूएन ही एक अद्वितीय संस्था आहे. आम्हाला हे व्यासपीठ जपायचे आहे आणि त्यात आणखी सुधारणा करण्याची आशा आहे”, असे डेनिसोव्ह यांनी म्हटले.
UNSC मध्ये रशिया, चीन, अमेरिका, ब्रिटन आणि फ्रान्स असे पाच स्थायी सदस्य आहेत. या पाच देशांना कोणत्याही मुद्द्यावर व्हेटोचा अधिकार आहे.
हेही वाचा – ‘पीओपी’च्या मूर्तींचे कृत्रिम तलावात विसर्जन करणे बंधनकारक; मुंबई महापालिकेचा फतवा
