मेघश्याम पुंडलिक रेगे उर्फ मे. पुं. रेगे हे तत्वज्ञानाचे प्राध्यापक, महाराष्ट्रातील अव्वल दर्जाचे विचारवंत आणि तत्त्वज्ञ होते. त्यांचा जन्म 24 जानेवारी 1924 रोजी झाला. त्यांचे प्राथमिक शिक्षण रत्नागिरी येथे नगरपालिका शाळेत झाले. त्यांचे माध्यमिक शिक्षण पार्ले टिळक विद्यालय, किंग जॉर्ज हायस्कूल मुंबई आणि महाविद्यालयीन शिक्षण बी.ए. तत्त्वज्ञान एल्फिन्स्टन महाविद्यालय, एम.ए.चे शिक्षण मुंबई विद्यापीठ येथे झाले. महाराष्ट्राच्या तत्त्वज्ञानिक आणि वैचारिक क्षेत्रात आपला निर्विवाद ठसा उमटवलेल्या मोजक्या अभ्यासकांमध्ये रेगे यांचा समावेश होतो. त्यांनी मराठी भाषकांना पाश्चात्य तत्त्वज्ञान परंपरेचा मुक्तपणे परिचय करून दिला.‘पाश्चात्त्य नीतीशास्त्राचा इतिहास’, ‘तत्त्वज्ञानातील समस्या’ ही भाषांतरे, ‘नवभारत (मासिक)’ मधील त्यांचे लेख आणि विश्वकोशातील पाश्चात्य तत्त्वज्ञानविषयक व तत्त्ववेत्यांच्या नोंदी पाहता रेगे यांच्या कार्याची, पश्चिमी तत्त्वज्ञान मराठीत आणण्यासाठी त्यांनी केलेल्या प्रयत्नांची खात्री पटेल.
मार्च 1996 मध्ये ते मुंबई महानगर साहित्य संमेलनाचे अध्यक्ष होते. त्यांनी काही काळ ‘नवभारत’ आणि ‘क्विस्ट’ या मासिकांचेही संपादन केले. ‘नवभारत’मध्ये त्यांनी संपादकीय, लेख, पुस्तक परीक्षणे अशा विविध स्वरूपांचे लेखन केले.‘इहवाद आणि सर्वधर्मसमभाव’,‘विवेक आणि न्याय : आधुनिक महाराष्ट्रातील प्रबोधनपर्व’, ‘विवेकवाद, विज्ञान आणि श्रद्धा’,‘स्वातंत्र्य आणि न्याय’,‘हिदू धार्मिक परंपरा आणि सामाजिक परिवर्तन’ ही त्यांची स्वतंत्र पुस्तके आहेत. रेगे यांचे ‘मर्मभेद’ हे संपादित पुस्तक त्यांच्या निधनानंतर प्रकाशित झाले. मे.पुं. रेगे हे तर्कतीर्थ लक्ष्मणशास्त्री जोशी यांच्यानंतर मराठी विश्वकोश मंडळाचे अध्यक्ष होते. अशा या व्यासंगी तत्त्वज्ञाचे 28 डिसेंबर 2000 रोजी निधन झाले.
