नौशाद अली हिंदी चित्रपटसृष्टीतील आघाडीच्या संगीत दिग्दर्शकांपैकी एक मानले जातात. नौशाद अली यांचा जन्म २५ डिसेंबर १९१९ रोजी लखनऊ येथे झाला. लहानपणी नौशाद लखनऊपासून २५ किमी अंतरावर असलेल्या बाराबंकी येथील देवा शरीफ येथे वार्षिक जत्रेला भेट देत असत.
तिथे त्या काळातील सर्व महान कव्वाल आणि संगीतकार भक्तांसमोर सादरीकरण करीत. त्यांनी उस्ताद घुरबत अली, उस्ताद युसूफ अली, उस्ताद बब्बन साहेब आणि इतरांच्या हातून हिंदुस्थानी संगीताचा अभ्यास केला. नौशाद हे पियानो वादकही होते. त्यांनी संगीतकार उस्ताद मुश्ताक हुसेन यांच्या ऑर्केस्ट्रामध्ये पियानोवादक म्हणून काम केले. ते विशेषतः चित्रपटांमध्ये शास्त्रीय संगीताचा वापर लोकप्रिय करण्यासाठी ओळखले जातात.
नौशाद आधीच मूकयुगात सिनेमाचे चाहते बनले होते. त्यानंतर १९३१ मध्ये भारतीय सिनेमाला आवाज आणि संगीत मिळाले, ज्याने १३ वर्षांच्या मुलाला आणखी मोहित केले. वडिलांच्या इच्छेविरुद्ध त्यांनी शास्त्रीय आणि लोकसंगीत शिकले. संगीतकार म्हणून कारकिर्दीसाठी ते १९३७ च्या उत्तरार्धात मुंबईत आले. स्वतंत्र संगीत दिग्दर्शक म्हणून त्यांचा पहिला चित्रपट १९४० मध्ये प्रेम नगर हा होता.
त्यांचा पहिला संगीतदृष्ठ्या यशस्वी चित्रपट रतन (१९४४), त्यानंतर ३५ रौप्य महोत्सवी हिट, १२ सुवर्ण महोत्सवी आणि ३ डायमंड ज्युबिली मेगा यश त्यांना मिळाले. हिंदी चित्रपटसृष्टीतील योगदानाबद्दल नौशाद यांना अनुक्रमे १९८१ आणि १९९२ मध्ये दादासाहेब फाळके आणि पद्मभूषण पुरस्काराने सन्मानित करण्यात आले. ५ मे २००६ रोजी वयाच्या ८६ व्या वर्षी हृदयविकाराच्या झटक्याने नौशाद यांचे मुंबईत निधन झाले.