कॉमेडियन समय रैनाचा ‘इंडियाज गॉट लेटेन्ट’ हा शो सध्या वादात अडकला आहे. या शोमध्ये सहभागी झालेल्या यूट्यूबर रणवीर अलाहाबादियाने पालकांविषयी केलेल्या आक्षेपार्ह वक्तव्यामुळे सर्वत्र नाराजी पसरली आहे. शोमध्ये वापरलेला कंटेंट, भाषा, विषय एकूणच असभ्य आणि अश्लील असल्याचे म्हणत या कार्यक्रमावर बंदी घालण्याची मागणी केली जातेय. अशातच आता भाडीपाचा ‘अतिशय निर्लज्ज कांदेपोहे’ हा कार्यक्रम मनसेच्या निशाण्यावर आलाय. उद्या (14 फेब्रुवारी) रोजी याचा शो होणार होता. जो आता पुढे ढकलण्यात आल्याचे समजत आहे. (Atishay Nirlajja Kande Pohe show of Bhadipa in trouble)
भाडिपा अडचणीत येण्याची शक्यता
भाडिपाच्या आतापर्यंत झालेल्या प्रत्येक शोला प्रेक्षकांनी प्रचंड प्रेम दिले आहे. मात्र, आता भाडिपाच्या ‘अतिशय निर्लज्ज कांदेपोहे’ या कार्यक्रमावर गदा आली आहे. पुण्यात मनसेने या कार्यक्रमाचा विरोध केला आहे. मनसेचे पुणे शहराध्यक्ष आणि मनसे चित्रपट सेनेने सारंग साठे आणि भाडिपा चॅनलचा जाहीर निषेध केला आहे. मुख्य म्हणजे भाडिपाचे आगामी कार्यक्रम आम्ही मनसे स्टाईलने बंद पाडू, असा थेट इशारादेखील दिला आहे. याविषयी मनसे चित्रपट सेनेचे शहराध्यक्ष चेतन धोत्रे यांनी संताप व्यक्त करताना एक पोस्ट शेअर केली आहे.
काय लिहलंय पोस्टमध्ये?
मनसे चित्रपट सेना पुणे शहराध्यक्ष चेतन धोत्रे यांनी आपल्या पोस्टमध्ये लिहिलंय, ‘रणवीर अलाहबादिया आणि सारंग साठे सारखेच! रणवीर अलाहबादिया हा असं वक्तव्य करेल हे कोणालाही वाटलं नव्हतं. मात्र त्याच्या वक्तव्याने अनेकांची मान शरमेने खाली गेली. तसेच काहीसे आपल्या मराठीतील कलाकारांचे मराठी संस्कृतीचे ऑनलाइन धडे देणारे ‘भाडिपा’ (YouTube Channel) यांचा देखील थिल्लर चाळे चालणारा ‘अतिशय निर्लज्ज’ नावाचा शो मराठी माणसाच्या विचारसरणीला आणि अस्मितेला न शोभणारा आहे. या चॅनेलकडून अनेकदा स्वतःचा TRP वाढवण्याकरिता आपली संस्कृतीमूल्य, कुटुंबसंस्था यांचं वेळोवेळी अवमूल्यन होतंच असतं , हे असे आगावूपणे बोलणे बास झालं आता’.
‘ही कीड आता सगळीकडे पसरत चालली आहे परंतु आता पुण्यात हे होऊन दिलं जाणार नाही. त्यांनी लोकांची चांगल्या पद्धतीने करमणूक करावी त्याला मनसे चित्रपट सेना नेहमी साथ देईल. परंतु या बाकीच्या भानगडीत पडू नये. कार्यक्रमातील अनेक कमेंट मराठी माणसाला शरमेने मान खाली घालवणाऱ्या आहेत. परंतु आता यांच्या या लाईक सब्सक्राइबच्या अश्लील भाषेतील चाळ्यांना माफ केलं जाणार नाही. या पोस्ट च्या माध्यमातून मनसे चित्रपट सेनेकडून सारंग साठे आणि सो कोल्ड भाडिपा चॅनलचा जाहीर निषेध करीत आहोत. यांच्या हाऊसफुल्ल होणाऱ्या शो ला जाताना मराठी माणसांनी आपल्या मराठी संस्कृतीचा एकदा विचार करा.यांचे यापुढील पुण्यातील कार्यक्रम मनसे चित्रपट सेना मनसे स्टाईलने बंद पाडणार इतके नक्की..!!
रणवीर अलाहाबादियाच्या विधानामुळे खळबळ
प्रसिद्ध यूट्यूबर रणवीर अलाहाबादियाने ‘इंडियाज गॉट लेटेन्ट’मध्ये पालकांवर केलेल्या आक्षेपार्ह विधानानंतर सर्वत्र संतापाची लाट उसळली आहे. विशेष म्हणजे रणवीरने आपल्या विधानाबाबत माफी मागूनही वाद संपायचे नाव घेत नाहीये. रणवीर अलाहाबादिया हा एक प्रसिद्ध युट्यूबर आहे. ज्याला ‘बीयरबाइसेप्स’ म्हणून ओळखतात. त्याचा पॉडकास्ट शो कायम चर्चेत असतो. त्याने शाळेत असतानाचं युट्यूब चॅनेल सुरू केलं होतं. आता त्याचे एकूण 7 चॅनेल्स सुरु आहेत. त्यापैकी ‘बीयरबाइसेप्स’ सर्वाधिक लोकप्रिय चॅनेल आहे.
हेही पहा –