येत्या आठवड्यात 14 फेब्रुवारी रोजी प्रदर्शित होणाऱ्या ‘छावा’ची सध्या सर्वत्र जोरदार चर्चा आहे. कलाकार, दिग्दर्शन, सिनेमॅटोग्राफी, व्हीएफएक्स हे सगळे कमाल आहेच. याव्यतिरिक्त सिनेमाला लाभलेली कथा आणि पटकथा लिहिणारी टीमही तितकीच जबरदस्त आहे. ऐतिहासिक सिनेमा असल्याने त्याची मांडणी पडद्यावर योग्यरित्या होणे खूप महत्वाचे असते. ही जबाबदारी लक्ष्मण उतेकर, ऋषी वीरमानी, कौस्तुभ सावरकर, उन्मन बनकर आणि ओंकार महाजन यांनी लीलया पेलली आहे. ओंकार महाजनची ही पहिली फिचर फिल्म आहे. त्याच्यासाठी हा खास अनुभव होता. हा आनंददायी क्षण त्याने सर्वांसोबत शेअर केला आहे. (Chhaava Movie Direction Team Member Omkar Mahajan Express His Feelings)
मी खूप नशीबवान..
ओंकार महाजन म्हणतात, ‘फिचर फिल्म म्हणून हा माझा पहिला चित्रपट आणि पहिलाच चित्रपट इतक्या नामवंतांसोबत करायला मिळणे, यासाठी मी स्वतःला खूप नशीबवान समजतो. यापूर्वी लक्ष्मण सरांसोबत मी असोसिएट म्हणून काम केले आहे. त्यामुळे या प्रोजेक्टसाठी त्यांनी पहिला फोन मला केला. मग हळूहळू त्यात एकेक जण सहभहगी झाले. ऋषी सरांचे हिंदीवर प्रभुत्व असल्याने, कौस्तुभने यापूर्वी ‘लोकमान्य’साठी संवाद लिहिले आहेत, त्याचा इतिहासाचा अभ्यास आहे’.
‘उन्मननेही कौस्तुभसोबत काही चित्रपट केले आहेत. तर या सगळ्यांना घेऊन आमची एक टीम तयार झाली. कोरोनाच्या पहिल्या लॉकडाऊनपासून आमचे या चित्रपटावर काम सुरु झाले. सुरुवातीच्या काळात आमचे फक्त व्हिडीओ कॉन्फरन्सवर काम सुरु होते. साधारण दोन अडीच वर्ष आम्ही कथा, पटकथेवर काम केले आणि अखेर आज आमचा ‘छावा’ प्रेक्षकांच्या भेटीला येणार आहे’.
विकिसोबत कामाचा अनुभव खूपच छान..
विकी कौशलसारख्या अष्टपैलू अभिनेत्यासोबत काम करण्याच्या अनुभवाबद्दल ओंकार महाजन म्हणाला, ‘विकी आणि आमच्या टीमचे पहिले संभाषण चित्रीकरण सुरु व्हायच्या आधी झाले होते. विकी पिअर्सिंग करण्यासाठी आला होता आणि स्क्रिप्टवर काम करत बसलो होतो. साधारण 20-22 दिवसांनी चित्रीकरण सुरु होणार होते. आमच्यासाठी त्याला भेटण्याचा अनुभव कमाल होता. आम्ही तसे नवीन आहोत. मात्र विकी एक प्रसिद्ध अभिनेता आहे. असं असतानाही ज्यापद्धतीने तो आमच्यासोबत वागत, बोलत होता. त्याला तोड नाही’.
‘चित्रीकरणादरम्यान आम्ही प्रत्येकजण सेटवर असायचो. तोदेखील आमच्यासोबत सौजन्यतेने वागायचा. त्याच्यात काहीतरी जादू आहे. सेटवरही तो स्वतः येऊन मिठी मारणार, चौकशी करणार. तो एक अभ्यासू आणि तितकाच गुणी अभिनेता आहे. त्याचे मराठीबाबत काही प्रश्नही असायचे. बऱ्याचदा आमच्यात याबद्दल चर्चाही व्हायची. त्यामुळे विकी कौशलसोबत काम करण्याचा अनुभव खूपच छान होता’.
हेही पहा –
Gori Hai Kalaiyan : ‘मेरे हसबंड की बीवी’ सिनेमातील ‘गोरी है कलैयाँ’ गाणे रिलीज