Thursday, March 27, 2025
27 C
Mumbai
HomeमनोरंजनChiki Chiki Booboom Boom : मैत्रीचं रंगतदार सेलिब्रेशन चिकी चिकी बुबूम बुम

Chiki Chiki Booboom Boom : मैत्रीचं रंगतदार सेलिब्रेशन चिकी चिकी बुबूम बुम

Subscribe

आपल्या मित्र मैत्रिणींसोबत घालवलेला प्रत्येक दिवस खरंच कमाल असतो. तेव्हाचे क्षण, केलेली गंमत, मित्र- मैत्रिणींसोबत केलेली भांडणं या गोष्टी राहून राहून आठवतात. विचार करा बऱ्याच वर्षानंतर शाळेतल्या त्या सर्व मित्र- मैत्रिणींसोबत तुम्हाला धम्माल, मज्जा, मस्ती करण्याची संधी मिळाली तर? रियुनियनची अशीच संधी साधत सेलिब्रेशनसाठी जमलेल्या मित्रांची गोष्ट सांगणारा ‘चिकी चिकी बुबूम बुम’ हा धमाल चित्रपट शुक्रवारी 28 फेब्रुवारी 2025 रोजी सिनेगृहात मनोरंजनासाठी सज्ज होणार आहे. (Chiki Chiki Booboom Boom movie story based on celebration of friendship)

पार्टीतली गंमत आणि धमाल हे सगळं अनुभवताना येणार काही गोष्टींचं वळण या रियुनियनच्या सेलिब्रेशनमध्ये सहभागी झालेल्या मित्रांच्या आनंदाची रंगत वाढवणार की त्यांची पळता भुई थोडी होणार? हे पाहणं प्रेक्षकांसाठी रंजक असणार आहे. स्वप्नील जोशी, प्रार्थना बेहरे, प्राजक्ता माळी, प्रसाद महादेव खांडेकर, रोहित माने, प्रथमेश शिवलकर, नम्रता संभेराव, वनिता खरात, सचिन गोस्वामी, ओंकार राऊत, प्रियदर्शनी इंदलकर, अभिजीत चव्हाण, निखिल रत्नपारखी, प्रभाकर मोरे, चेतना भट, निखिल बने, श्याम राजपूत, ऐश्वर्या बडदे, श्लोक खांडेकर, प्रमोद बनसोडे या कलाकारांची फौज ‘चिकी चिकी बुबूम बुम’ चित्रपटात हास्याचे फवारे उडवत रंगत आणणार आहेत.

नुकतीच या चित्रपटाची टीम मुंबईतील सिद्धिविनायक बाप्पाच्या चरणी पोहोचली होती. चित्रपटातील कलाकारांसोबत निर्मातेदेखील उपस्थित होते. यावेळी सर्वांनी मिळून चित्रपटाला यश मिळावे अशी गणरायाकडे प्रार्थना केली. या चित्रपटाच्या टीझरमधून ‘इकडे आड तिकडे विहीर’, ‘आगीतून फुफाट्यात’, ‘धरलं तर चावतंय सोडलं तर पळतंय’, ‘बुडत्याचा पाय खोलात’, ‘दुष्काळात तेरावा महिना’ या म्हणींच्या माध्यामातून बॅकबेंचर्सची मजेशीर ओळख करून देण्यात आली आहे. त्यामुळे चित्रपटाविषयी प्रेक्षकांची उत्सुकता वाढली आहे.

नारकर फिल्म्स अँड एंटरटेनमेंट निर्मित, आयडियाज द एंटरटेनमेंट कंपनी प्रस्तुत आणि स्वर्ण पट कथा आणि प्रजाकार प्रोडक्शन्स यांच्या सहयोगाने येणाऱ्या ‘चिकी चिकी बुबूम बुम’ चित्रपटाचे दिग्दर्शन प्रसाद महादेव खांडेकर यांचे आहे. चित्रपटाचे निर्माते सुनील नारकर असून सहनिर्माते सेजल दिपक पेंटर आणि प्रसाद महादेव खांडेकर आहेत. चित्रपटाचे लेखन प्रथमेश शिवलकर, प्रसाद महादेव खांडेकर यांचे आहे. प्रशांत मडपुवार, मंदार चोळकर यांनी लिहिलेल्या गाण्यांना रोहन प्रधान, रोहित राऊत, जुईली जोगळेकर, कविता राम यांचा स्वरसाज आहे. रोहन-रोहन जोडीचे जबरदस्त संगीत चित्रपटाला लाभले आहे. राहुल ठोंबरे, सुजित कुमार यांनी नृत्यदिग्दर्शन केले आहे. छायांकन गणेश उतेकर तर संकलन निलेश गावंड यांचे आहे.

हेही पहा –

Prajakta Mali : प्राजक्ताशिवाय सादर होणार त्र्यंबकेश्वर मंदिरातील शिवस्तुती नृत्याविष्कार