शिवकुमार पार्थसारथी दिग्दर्शित ‘डोक्याला शॉट’ या चित्रपटाच्या अफलातून ट्रेलर नंतर आता या चित्रपटातील ‘जोरू का गुलाम’ हे धमाकेदार गाणे प्रदर्शित झाले आहे. हे गाणं पार्टी सॉंग असून, सुव्रत, प्राजक्ता यांच्या सोबत गणेश पंडित, रोहित हळदीकर, ओंकार गोवर्धन हे सुद्धा या गाण्यात दिसत आहेत. लग्न ठरल्यानंतर त्याचे तोटे काय काय आहेत हे सुव्रतला त्याचे मित्र सांगत आहेत. म्हणून ते सुव्रतला ‘तू नही तेरी मर्जी का मालिक तू गुलाम तेरी जोरू का’ असे म्हणत चिडवत आहेत.
यांचे लग्न ठरलेले असावे…
या हटके गाण्याच्या शब्दांवरून सुव्रत आणि प्राजक्ता यांचे लग्न ठरलेले असावे असे वाटते. या चित्रपटातील सुव्रतला मित्र अनोख्या पद्धतीने चिडवताना दिसत आहेत. गाण्याच्या सुरुवातीलाच दाक्षिणात्य संगीत ऐकू येते. तर दक्षिण भारतीय आणि महाराष्ट्रीय या दोन्ही संगीताचा अप्रतिम मेळ, हे गाणे ऐकताना जाणवत आहे.
असे करण्यात आले गाणं शूट
या गाण्याचे शूटिंग रात्री करण्यात आले आहे. तसेच ज्यावेळी शूट चालू आहे त्यावेळी त्या ठिकणी खूप थंडी असल्याचे दिसून येत आहे. या थंडीत गणेश पंडित हे नाचताना स्विमिंगपूल मध्ये पडतात. असे एक दृश्य आहे. तर गाण्याचे शूटिंग संपेपर्यंत त्यांना ओलेच राहावे लागले असल्याचे दिसून येत आहे. शूट संपले की लगेच ते दोन दोन ब्लॅंकेट घेऊन बसायाचे. जोपर्यंत गाणे पूर्ण चित्रित होत नाही तो पर्यंत किंबहुना तेवढ्या शूटिंगच्या रात्री त्यांना ओले राहावे लागत होते. पण तरीही त्यांनी हे शूटिंग पूर्ण केले तेही फुल्ल धमाल मजा, मस्ती करत.
चित्रपटाच्या टीमला एक सुखद धक्का
या गाण्यात एक सरप्राइज म्हणजे या चित्रपटाचे निर्माता उत्तुंग ठाकूर यांनी सुद्धा या गाण्यात ठेका धरला आहे. गाण्याच्या शूटिंगच्या वेळी सेटवरच चित्रपटाचे दिग्दर्शक शिवकुमार यांनी उत्तुंग ठाकूर यांना या गाण्यात डान्स करण्याची विनंती केली. ऐनवेळी केलेली ही विनंती उत्तुंग यांनी तितक्याच आनंदाने मान्य करत अवघ्या २० मिनिटात गाण्याच्या डान्स स्टेप शिकून सर्व कलाकारांसोबत तालावर ताल धरला. आणि संपूर्ण चित्रपटाच्या टीमला एक सुखद धक्का दिला.
गुरु ठाकूर यांच्या मार्मिक अशा शब्दांना मराठी आणि दक्षिण भारतीय मिक्स असे संगीत श्रीकांत आणि अनिता या नवोदित संगीतकार जोडीने दिले आहे. खरे पाहिले तर गाणे ऐकल्यावर वाटणारच नाही की संगीतकार हे नवीन आहेत. या चित्रपटाच्या निमित्ताने शिवकुमार पार्थसारथी दिग्दर्शनात पदार्पण करत आहे. या संगीताला कैलाश खेर यांच्या दमदार आवाजाची जोड मिळाल्याने गाण्याची मजा एका वेगळ्या उंचीवर जाऊन पोहचते. फुलवा खामकर यांनी या गाण्याचे सुंदर असे नृत्यदिग्दर्शन केले आहे. या चित्रपटाला रोहन-विनायक यांनी पार्श्वसंगीत दिले आहे तर सुमन साहू यांनी या सिनेमाचे छायाचित्रण केले आहे. तर या चित्रपटाची निर्माती उत्तुंग ठाकूर यांनी केली आहे.
वाचा – ‘डोक्याला शॉट’चा कॉमेडी ट्रेलर लॉन्च
वाचा – भाडिपाच्या लोकमंचावर रंगल्या औपचारिक गप्पा
