कॉफीची नजाकत काही वेगळीच! मग ती कोल्ड असो वा हॉट! कॉफीच्या शौकिन लोकांची संख्या कमी नाही. कॉफीचा खरपूस दरवळ जसा घरभर पसरतो, तसाच आता रंगभूमीवर कॉफीचा दरवळ पसरणार आहे. ज्येष्ठ दिग्दर्शक महेश वामन मांजरेकर यांनी ही ‘फिल्टर कॉफी’ नाट्यरसिकांसाठी आणली आहे. अद्वैत आणि अश्वमी थिएटर्स प्रकाशित महेश वामन मांजरेकर सादर करीत असलेली ही तजेलदार कॉफी 6 एप्रिल 2025 रोजी रंगभूमीवर येणार आहे. (Mahesh Manjrekar new marathi drama filter coffee coming soon)
रितीशा प्रोडक्शन्स निर्मित महेश वामन मांजरेकर लिखित आणि दिग्दर्शित ‘फिल्टर कॉफी’ या नाटकाचे निर्माते दिलीप माधव जगताप आहेत. तर सहनिर्माते राहुल भंडारे आहेत. ‘फिल्टर कॉफी’ या नव्याकोऱ्या नाटकात अभिनेता विराजस कुलकर्णी, विक्रम गायकवाड, कुणाल मेश्राम यांसह अभिनेत्री अंकिता लांडे आणि उर्मिला कानिटकर यांच्या मुख्य भूमिका आहेत.
याप्रसंगी बोलताना महेश मांजरेकर म्हणाले, ‘1992 साली मला हे नाटक करायचं होतं. त्यावेळी ते शक्य झालं नाही. आता हे नाटक मी आणलं असून ते स्वतः दिग्दर्शित करतोय. कॉफीच्या गडद रंगाप्रमाणे या नाटकाची गडद शेड नाट्य रसिकांना अनुभवायला मिळेल. सस्पेन्स थ्रिलर असं हे नाटक आहे. मराठी नाट्यरसिक प्रगल्भ आहेत. वेगळ्या संहिताचं स्वागत त्यांनी नेहमीचं केलं आहे. माझ्या सोबतीने निर्माते, कलाकार आणि तंत्रज्ञ अशी आम्ही सगळ्यांनी मिळून प्रेक्षकांच्या मनोरंजनासाठी आणलेली कडू गोड चवीच्या ‘फिल्टर कॉफी’ची ट्रीट नाट्यरसिक नक्कीच एन्जॉय करतील’, असा विश्वास मांजरेकरांनी व्यक्त केला आहे.
या नाटकाविषयी बोलताना अभिनेता विराजस कुलकर्णी म्हणाला, ‘वैविध्यपूर्ण नाटक मराठी रंगभूमीवर येत आहेत. ज्याला नाट्यरसिकांचा उत्तम प्रतिसाद मिळतोय. रंगभूमीमुळे मराठी चित्रपटसृष्टीला एक वेगळी ओळख मिळतेय. नाटक हे नेहमी दिग्दर्शकाचं मानलं जातं. दिग्दर्शकाच्या नावामुळे नाट्यरसिक नाटक पाहायला येतात. महेश मांजरेकर याचं नाव त्यात अग्रस्थानी आहे. त्यांच्या कलाकृती पाहत मी मोठा झालोय. त्यांच्यासोबत काम करण्याची संधी दवडणे शक्य नव्हते. आम्ही घेऊन येत असलेलं हे नाटक थ्रीलर जॉनरचे असून काहीतरी वेगळी कलाकृती नाट्यरसिकांना पाहायला मिळणार आहे याची खात्री देतो’.
यावेळी बोलताना अभिनेत्री उर्मिला कानिटकरने सांगितले, ‘माझी ही पहिली नाट्यकृती असून महेश मांजरेकर यांच्यासारख्या दिग्ग्ज दिग्दर्शकासोबत काम करणं ही माझ्यासाठी पर्वणी आहे. या नाटकाच्या निमित्ताने माझी नाटक करायची इच्छा पूर्ण झाली याचा मला खूप आनंद आहे’. ‘फिल्टर कॉफी’ या नाटकाचे सहलेखन अभय देखणेने केले आहे. तर सहाय्यक दिग्दर्शकाही जबाबदारी सुरज कांबळेने सांभाळली आहे. संगीताची बाजू हितेश मोडक यांनी सांभाळली असून शीतल तळपदे यांनी प्रकाशयोजना आणि नेपथ्य संदेश बेंद्रे यांनी केले आहे. तसेच वेशभूषा लक्ष्मण येलप्पा गुल्लार यांची आहे आणि दिपक कुलकर्णी यांचे नाटकासाठी विशेष सहकार्य लाभले आहे.
हेही पहा –
Aamir Khan : आमीर खानची कारकीर्द साजरी करण्यासाठी सिनेमहोत्सवाची घोषणा