काळ बदलला तरी स्वामींच्या अस्तित्वाची जाणीव आजही तितकीच प्रबळ आहे. त्यामुळे नव्या युगातील श्रद्धा, विश्वास आणि अध्यात्माची सांगड घालणारा एका नवा चित्रपट लवकरच आपल्या भेटीस येत आहे. ‘मी पाठीशी आहे’ असे या चित्रपटाचे नाव असून नुकताच याचा ट्रेलर सोशल मीडियावर प्रदर्शित करण्यात आला आहे. हा ट्रेलर पाहून प्रेक्षकांमध्ये चित्रपटाबाबत प्रचंड उत्सुकता निर्माण झाली आहे. येत्या 28 मार्च 2025 रोजी हा चित्रपट सर्वत्र थिएटरमध्ये प्रेक्षकांच्या भेटीला येणार आहे. (Mi Pathishi Ahe Movie Trailer Released)
‘मी पाठीशी आहे’ हा चित्रपट स्वामी समर्थांच्या अद्भुत लीलांवर आधारलेला आहे. त्यांच्या अस्तित्वावर विश्वास ठेवणाऱ्या भक्तांसाठी हा चित्रपट म्हणजे एखाद्या प्रेरणादायी प्रवासासारखा असेल. नुकत्याच प्रदर्शित झालेल्या ट्रेलरमध्ये अभिनेता सक्षम कुलकर्णी मुख्य भूमिकेत असल्याचे समजत आहे. या चित्रपटाचे कथानक सामान्य माणसांच्या आयुष्यात येणाऱ्या चढ- उतारांचा वेध घेणारे आहे. एकूणच यात अध्यात्म आणि मनोरंजनाचा संगम दर्शवला आहे. हा एक कौटुंबिक चित्रपट असून ट्रेलरमध्ये माधुरी पवार हिच्या दमदार लावणीची झलक देखील पाहायला मिळत आहे.
View this post on Instagram
या चित्रपटाचे दिग्दर्शन पराग अनिल सावंत यांनी केले आहे. ट्रेलरबाबत बोलताना ते म्हणाले, ‘मी पाठीशी आहे हा चित्रपट म्हणजे श्रद्धा आणि विश्वासावर उभा राहिलेला एक प्रवास आहे. स्वामी समर्थ हे केवळ एक दैवी शक्ती नाही तर अनेकांच्या आयुष्यातील मार्गदर्शक आहेत. त्यांचा आशीर्वाद आणि कृपा कशी जीवनात सकारात्मक बदल घडवू शकते, हे आम्ही या कथेतून दाखवण्याचा प्रयत्न केला आहे. प्रेक्षकांना 28 मार्चला ही प्रेरणादायी कथा मोठ्या पडद्यावर अनुभवायला मिळेल. हा चित्रपट आम्ही बनवला नसून स्वामींनी ही कलाकृती आमच्याकडून साकारून घेतली आहे’.
ऑफबीट प्रॉडक्शन, नित्य सेवा प्रॉडक्शन आणि वेरा प्रॉडक्शन निर्मित ‘मी पाठीशी आहे’ या चित्रपटाची कथा, संकलन आणि दिग्दर्शन पराग अनिल सावंत यांनी केले आहे. तर निर्मिती सूत्र स्वामींचे सेवेकरी मयूर अर्जुन खरात, लक्ष्मीकांत गजानन कांबळे, ॲड. शुभांगी किशोर सोनवले, प्रमोद नंदकुमार मांडरे, शितल सोनावणे, ऋतुजा नरेंद्र कदम, अनिल गावंड आणि केतन कल्याणकर यांनी सांभाळली आहेत. संजय नवगिरे, दिलीप परांजपे यांनी चित्रपटाची पटकथा लिहिली असून संजय नवगिरे यांनी चित्रपटाचे संवादही लिहिले आहेत. या चित्रपटात सक्षम कुलकर्णी, सतीश पुळेकर, अरुण नलावडे, सुहास परांजपे, वर्षा प्रभु, श्रीकांत पाटील, अश्विनी चवरे, प्रसाद सुर्वे, शितल सोनावणे, सूचित जाधव, श्रद्धा महाजन, राजवीर गायकवाड, वैष्णवी पोटे हे कलाकार मुख्य भूमिकेत झळकणार आहेत.
हेही पहा –
Shreya Ghoshal Birthday : गोड गळ्याची श्रेया घोषाल, एका गाण्यासाठी घेते इतके पैसे