पालघर: पालघर येथील वाडा- भिवंडी मार्गावर ट्रेलरचा अपघात झाला. ज्यात वाहनचालकाचा जागीच मृत्यू झाल्याची घटना समोर येत आहे. वाडा- भिवंडी रस्त्यावर ट्रेलरमधून वाहतूक होत असताना अवजड स्टील एच.आर. कॉइलचे बंडल साखळी तुटून थेट ट्रेलरच्या केबिनवर पडल्याने भीषण अपघात झाला. या अपघातात ट्रेलरच्या केबिनचा पूर्णतः चक्काचूर झाला असून चालकाचा जागीच मृत्यू झाला आहे. अपघात बळी गेलेल्या वाहनचालकाचे नाव हे विनोदकुमार केदार सिंग (वय ४९) आहे. विनोदकुमार सिंग हे मूळचे सराईभारती, उत्तर प्रदेश येथील रहिवासी आहे. या अपघात प्रकरणी वाडा पोलीस ठाण्यात भारतीय न्यायसंहिता २०२३ च्या कलम १०६, २८११२५ (अ)(ब), मोटार वाहन कायदा १८४ अन्वये गुन्ह्याची नोंद करण्यात आली आहे. पाहुणीपाडा परिसरात सोमवारी सकाळच्या सुमारास हा भीषण अपघात घडला आहे.
गुजरातमधील वडोदरा येथे जाण्यासाठी एक ट्रेलर अवजड स्टेनलेस स्टील एच.आर. कॉइल वाडा- भिवंडी मार्गावरून घेऊन निघाला होता. रस्त्यात ट्रेलर चालकाला अचानक समोर गतिरोधक असल्याचे निदर्शनास आले. यावेळी भरधाव वेगात असलेल्या ट्रेलरच्या वेगावरचे नियंत्रण मिळवण्यासाठी चालकाने अचानक ब्रेक दाबला. यावेळी ब्रेकच्या धक्क्याने ट्रेलरच्या मागे लोखंडी साखळीने बांधलेल्या स्टील कॉइलची बंडल साखळी तुटली आणि ते सर्व कॉइल हे थेट ट्रेलरच्या कॅबिनवर पडले. त्यामुळे केबिनचा अक्षरशः चक्काचूर झाला. या भीषण अपघातात केबिनमध्ये असलेला ट्रेलर चालक कॉइल खाली दबल्याने त्यांचा जागीच दुर्दैवी मृत्यू झाला आहे. भिवंडी- वाडा मार्गावर या आधीही अनेक अपघात झाले आहेत. या अपघातामध्ये ४०० हून जास्त लोकांना जीव गमवावा लागला होता. मुंबई अहमदाबाद आणि मुंबई -आग्रा या प्रमुख रस्त्यांना हा मार्ग जोडतो.