विरार : वसई- विरार महापालिकेचा सन २०२५- २६ चा अर्थसंकल्प शुक्रवार ७ मार्च रोजी प्रशासक तथा पालिका आयुक्त यांच्याकडून सादर करण्यात आला. मागील वर्षीच्या तुलनेने या वर्षी ८१४ कोटी रुपयाची भरीव वाढ करत ३ हजार ९२६ कोटी ४४ लाखांची तरतूद करण्यात आली आहे. या अर्थसंकल्पाचे वैशिष्ट्य म्हणजे या वर्षीसुद्धा पालिकेकडून कोणतीही करवाढ करण्यात आली नसल्याने सामान्य नागरिकांना दिलासा मिळाला आहे. त्यात या वर्षीच्या अर्थसंकल्पात विविध नागरी सुविधांवरील खर्च वाढविण्यात आला असून नागरिकांना अनेक नव्या सुविधा देण्याचा मानस पालिकेने अर्थसंकल्पातून दाखविला आहे.वसई- विरार शहर महानगरपालिकेचा सन २०२४-२५ च्या सुधारित अर्थसंकल्पासह सन २०२५-२६ चा मूळ अर्थसंकल्प दिनांक ७ मार्च २०२५ रोजी अतिरिक्त आयुक्त संजय हेरवाडे, यांनी प्रशासक आयुक्त अनिलकुमार पवार यांना सादर केला.
सदर अर्थसंकल्प सन २०२४-२५ चा सुधारीत ३ हजार ५३८ कोटी व सन २०२५-२६ चा मूळ अर्थसंकल्प ३ हजार ९२६ कोटींचा असून २.४० कोटी शिलकेचा आहे. सन २०२५-२६ या चालू वर्षामध्ये आर्थिक शिस्तीचे पालन करण्यात आले असून अर्थसंकल्पामध्ये पाणीपुरवठा योजना व मलनिस्सारण योजनांवर भरीव तरतूद करण्यात आलेली आहे.महानगरपालिकेची अग्निशमन व आणिबाणी सेवा विभागाची मुख्य अग्निशमन केंद्र यासाठी सन 2024-25 मध्ये १८ कोटी १९ लाख इतकी तरतूद प्रस्तावित करण्यात आली असून सन २०२५ – २०२६ मध्ये ५९ कोटी ४७ लाख इतकी तरतूद प्रस्तावित केली आहे. तर शहरातील दैनंदिन साफसफाई, डास निर्मुलनासह सार्वजनिक स्वच्छता व घनकचरा व्यवस्थापन याच्यावर ५९३ कोटी ५१ लाख तरतूद केली आहे. महत्त्वाची बाब म्हणजे पालिकेने गरोदर माता आरोग्य तपासणी, टेली कन्सल्टेशन, लसीकरण, आरोग्यवाचक जनजागृती, रुग्णांची प्राथमिक तपासणी (ओपीडी), मोफत औषधे, तपासणी, रक्त चाचणी अशा विविध उपाययोजनां करिता भरीव आर्थिक तरतूद सन 2024-25 मध्ये ६७ कोटी ४१ लाख व सन २०२५- २०२६ मध्ये 88 कोटी 51 लाख इतकी तरतूदप्रस्तावित केली आहे.
तर दिव्यांग कल्याणकरीता सन २०२५-२६ मध्ये ११ कोटी ७० लाख इतकी तरतूद प्रस्तावित केली असून महिला बालकल्याणसाठी वसई- विरार शहर महानगरपालिकेने 21 कोटी ५६ लाख इतकी तरतूद प्रस्तावित केली आहे. यामध्ये दलित वस्ती सुधारणा योजनेंतर्गत शेतकर्‍यांसाठी सन 2025-26 मध्ये ४९ कोटी ७ लाख तरतूद तर परिवहन सेवेसाठी सन २०२५-२६ मध्ये अनुक्रमे ८० कोटी तरतूद केली आहे. तर शहर सौंदर्यीकरण, चौक, वाहतूक बेट, समाजमंदिर, नाट्यगृह, मार्केट, स्मशानभूमी व्यवस्थापन, तलाव सुशोभिकरण, फुटपाथ शहरांतर्गत उड्डाणपुले याकरिता विकास कामाबरील लेखाशिर्षात योग्य त्या अर्थसंकल्पीय तरतुदी 1011 कोटी ६७ लाख इतकी तरतूद यासाठी प्रस्तावित आहे. जॉगर्स ट्रेक, लहान मुलांची खेळणी, क्रिडा साहित्य, बैठक व्यवस्था करणे, उद्यान देखभाल तसेच दुरुस्ती करणे यासाठी 39 कोटी इतकी तरतूद शहरामधील असलेले विविध तलावाचे पुर्नजिविकरण व सुशोभिकरण करणे यावर भर दिला असून शासनाकडील अनुदानासह २७ कोटी इतकी तरतूद प्रस्तावित करण्यात आले आहे.
तर शालेय कला क्रिडा महोत्सव, राष्ट्रीय व आंतरराष्ट्रीय पातळीवर प्राविण्य मिळविणार्‍या खेडाळूंना प्रोत्साहन रक्कम देणे, महापौर मॅरेथॉन स्पर्धा आणि इतर क्रिडा विभागाच्या विविध योजनांकरिता ५१ कोटी इतकी भरीव तरतूद प्रस्तावित आहे. नालेखोदाई पूरप्रतिबंधक कामे या अंतर्गत विकासविषयक कामांसाठी २४ कोटी तरतूद प्रस्तावित केली आहे.