विरार : विरार पूर्वेकडील कोपरी गावातील सागर वझे या २७ वर्षीय तरुणाचा गावातील क्रिकेट मैदानावर क्रिकेट खेळताना हृदयविकाराचा झटका आल्याने मृत्यू झाल्याची घटना शुक्रवारी संध्याकाळी पाचच्या सुमारास घडली. यामुळे कोपरी गावातील वझे कुटुंब तसेच क्रिकेट संघावर दुःखाचा डोंगर कोसळला आहे. विरारच्या कोपरी गावातील उत्कृष्ठ फलंदाज म्हणून सागरची ओळख होती. अनेक ठिकाणी त्याने आपल्या खेळाच्या माध्यमातून ओळख निर्माण केली होती. सागर हा चांगला क्रिकेट खेळत होता. मृत्यूपूर्वी त्याने दोन चेंडूंवर दोन षटकार मारले होते.
सागरला या अगोदर हृदयविकाराचा झटका आला होता. तेव्हा डॉक्टरने त्याला क्रिकेट खेळायला मनाई केली होती. मात्र, क्रिकेटची आवड असल्याने तो शुक्रवारी आपल्या गावातील क्रिकेट मैदानात क्रिकेट खेळण्यासाठी गेला. सागरची फलंदाजी येताच त्याने दोन चेंडूवर सलग दोन षटकार भिरकावले. मात्र तिसरा षटकार भिरकावणार असताना त्याला हृदयविकाराचा झटका आला. त्याला उपचारासाठी दवाखान्यात नेले असता डॉक्टरांनी त्याला मृत घोषित केले. सागरचा क्रिकेटच्या मैदानातच क्रिकेट खेळताना हृदयविकाराच्या झटक्याने त्याचा मृत्यू झाला. यामुळे त्याचा आता खेळ पाहता येणार नसल्याच्या भावना परिसरातील क्रिकेट प्रेमी आणि खेळाडूंनी व्यक्त केल्या आहेत.