रायगड : ताम्हणी घाट हा मृत्यूचा सापळा बनत चालला आहे. गेल्या वर्षी ताम्हणी घाटाजवळ असलेल्या एका धोकादायक वळणावर बसचा भीषण अपघात झाला होता. त्यामध्ये 5 हून अधिक जणांचा मृत्यू झाल्याचे समोर आले होते. त्यानंतर मंगळवारीदेखील (4 मार्च) एसटी आणि चारचाकीचा भीषण अपघात झाला. यामध्ये 2 जणांचा मृत्यू झाला आहे. दुपारी एक ते दीड वाजताच्या सुमारास एसटी बस आणि स्विफ्ट गाडीचा अपघात झाला. या अपघातामुळे पुन्हा एकदा प्रवाशांच्या सुरक्षेचा मुद्दा समोर आला आहे. (Raigad Accident in Tamhani Ghat 2 died)
हेही वाचा : Biggest Family : 20 बायका आणि 104 मुलं, या माणसानं अख्ख गावच वसवलं; कसा चालतो उदरनिर्वाह
मिळालेल्या माहितीनुसार, खेड – चिंचवड ही एसटी बस पुण्याच्या दिशेकडे जात होती. तर स्विफ्ट गाडी ही विळे गावाच्या दिशेकडे येत होती. उतार आणि वेग असल्यामुळे गाडीवरचा ताबा सुटला आणि स्विफ्ट गाडी ही एसटीला धडकली. ही धडक एवढी जोरदार होती की यामध्ये स्विफ्टच्या चालकाच्या बाजूचा भाग बसमध्ये शिरला. यामुळे गाडीच्या एका बाजूचा चक्काचूर झाला. त्यामुळे वाहन चालक आणि चालकाच्या पाठीमागे बसलेल्या जेष्ठ महिलेच मृत्यू झाला. यावेळी त्यांचा मृतदेह हा गाडीतच अडकून पडला होता. यावेळी सह्याद्री वन्यजीव रक्षणार्थ सामाजिक संस्थेच्या सदस्यांनी आधुनिक साधनांच्या मदतीने दुपारी 3 वाजता ते मृतदेह बाहेर काढले.
अपघातामध्ये जखमी झालेल्या 3 जणांना माणगाव येथील उपजिल्हा रुग्णालयात उपचारासाठी घेऊन जाण्यात आले. जखमींमध्ये एका लहान मुलीचा समावेश असल्याचे सांगण्यात आले. यावेळी एसटीमधील प्रवाशांना कोणतीही इजा झाली नसल्याचे सांगण्यात आले. मिळालेल्या माहितीनुसार, अपघात झालेल्या गाडीमधील प्रवासी मुळशी तालुक्यातील शिंदेवाडी येथील असल्याची माहिती दिली. पण, ते मुळचे उडीसा राज्यातील असल्याचे सांगण्यात आले. अपघाताची माहिती मिळताच विळे दूरक्षेत्र पोलीस ठाण्याचे पोलीस उपनिरीक्षक राठोड आणि पोलीस विनोद तांदळे घटनास्थळी पोहोचले. तसेच येथील तुषार कदम आणि राकेश दगडे यांनी देखील घटनास्थळी जाऊन मदतकार्य सुरू केले. माणगाव पोलीस स्थानकाचे पोलीस निरीक्षक निवृत्ती बोऱ्हाडे आणि पोलीस कर्मचारी हे देखील रेस्क्यू टीम सोबत घटनास्थळी पोहचले होते.