पनवेल : पेण तालुक्यातील खुशबू ठाकरे या 9 वर्षांच्या आदिवासी मुलीचा 22 जानेवारी रोजी मृत्यू झाला. तिला कुष्ठरोग झालेला नसतानाही तिच्यावर कुष्ठरोगाचे उपचार सुरू करण्यात आले होते. या औषधांच्या दुष्पपरिणामुळे तिचा मृत्यू झाला. या प्रकरणी अद्याप गुन्हा दाखल झालेला नसून कुठल्याही प्रकारची चौकशी झालेली नाही. त्यामुळे अहिल्यानगरमधील श्रीरामपूरचे आदिवासी आमदार हेमंत ओगले यांनी खुशबूला न्याय देण्यासाठी शुक्रवारी (7 मार्च) विधानसभेत आवाज उठवला. खुशबूच्या मृत्युची चौकशी करून दोषींवर कारवाई करण्याची मागणी त्यांनी सभागृहात केली. त्यामुळे आतातरी या प्रकरणाची चौकशी होईल, अशी अपेक्षा व्यक्त केली जात आहे.
हेही वाचा… Pen News : अघोरी विद्येचा डाव उधळला, पेण तालुक्यातील नाडे स्मशानभूमीत बुधवारी मध्यरात्री काय घडलं
पेण तालुक्यातील बोरगाव ग्रामपंचायत हद्दीतील तांबडी आदिवासी वाडीमध्ये राहणारी खुशबू नामदेव ठाकरे वरवणे येथील शासकीय आश्रमशाळेत चौथीत शिकत होती. 16 डिसेंबर 2024 रोजी राष्ट्रीय कुष्ठरोग निर्मुलन कार्यक्रम अंतर्गत तिची तपासणी झाली. त्यात तिच्या अंगावरील तीन चट्ट्यांवरून ती कुष्ठरोगी असल्याचे निदान करण्यात आले. त्यानंतर 18 डिसेंबरपासून तिच्यावर कुष्ठरोगावरील उपचार सुरू झाले. मात्र, हे करताना तिच्या पालकांपासून ही माहिती लपवण्यात आली. त्यानंतर 22 जानेवारी रोजी तिचे निधन झाले.
हेही वाचा… Mahesh Motewar : जामिनावर बाहेर येताच महेश मोतेवारची फसवी योजना सुरू, नेमकं प्रकरण काय?
या प्रकरणी अजून गुन्हा दाखल झालेला नाही. त्यामुळे जनजागृती आदिवासी विकास संस्था आक्रमक झाली असून पेण प्रकल्प अधिकारी कार्यालय किंवा रायगड जिल्हाधिकारी कार्यालयाबाहेर बेमुदत उपोषणाला बसण्याचा इशारा संस्थेचे अध्यक्ष जेतू पारधी यांनी यापूर्वीच दिला आहे. या पार्श्वभूमीवर काँग्रेसचे आमदार हेमंत ओगले यांनी अर्थसंकल्पीय अधिवेशनात सलग दुसऱ्यांदा याबाबत प्रश्न उपस्थित केला आहे. खुशबूच्या मृत्युप्रकरणी आवाज उठवणाऱ्या राजीव गांधी पंचायत राज मिशनच्या राष्ट्रीय सचिव नंदा म्हात्रे यांनी याबद्दल आमदार हेमंत ओगले यांचे आभार मानले आहेत.
आमदार हेमंत ओगले यांनी याबाबत मंगळवारी प्रश्न उपस्थित केला होता. मात्र त्यावेळी सरकारकडून उत्तर देण्यात आले नव्हते. त्यामुळे शुक्रवारी त्यांनी पुन्हा हा प्रश्न उपस्थित केला. खुशबूला चुकीची औषधे देणाऱ्या पेण तालुक्यातील कामार्ली येथील प्राथमिक आरोग्य केंद्राच्या वैद्यकीय अधिकाऱ्यावर कारवाई करावी तसेच पेण तालुक्यातील आदिवासी विकास विभागाच्या वरवणे शासकीय आश्रमशाळा व्यवस्थापन यांच्यावर कारवाई करावी, अशी मागणी आमदार ओगले यांनी केली आहे.
(Edited by Avinash Chandane)