Raj Thackeray मुंबई : 27 फेब्रुवारी म्हणजे मराठी भाषा गौरव दिन. या मराठी भाषा गौरव दिनानिमित्त राज्याच्या विविध भागांत अनेक कार्यक्रम आयोजित केले जातात. यंदा महाराष्ट्र नवनिर्माण सेनेचे अध्यक्ष राज ठाकरे यांच्याकडून मराठी भाषा गौरव दिनानिमित्त कार्यक्रमाचं आयोजन करण्यात आलं आहे. मुंबईतील छत्रपती शिवाजी पार्क मैदानात मराठी भाषा गौरव दिनाचं औचित्य साधत मनसेकडून एक भव्य पुस्तक प्रदर्शन भरवण्यात येणार आहे. विशेष म्हणजे या पुस्तक प्रदर्शनाच्या पार्श्वभूमीवर काही मान्यवरांच्या आवडीच्या कवितांची मैफल रंगणार आहे.(Raj Thackeray Classic book exhibition at Shivaji Park by MNS Marathi language glory day News In Marathi)
या भव्य पुस्तक प्रदर्शनाबाबत स्वत: मनसे अध्यक्ष राज ठाकरे यांनी एक्सवर पोस्ट करत माहिती दिली आहे. तसेच, “मराठी माणसात वैश्विक दृष्टिकोन निर्माण व्हावा अशी आमची मनापासून इच्छा आहे, पण त्यासाठीची खिडकी ही मराठीची असावी. आणि म्हणूनच हे पुस्तक प्रदर्शन आयोजित करत आहोत. जरूर या प्रदर्शनाला भेट द्या”, असे आवाहनही राज ठाकरे यांनी केलं आहे.
मनसे आयोजित अभिजात पुस्तक प्रदर्शनानिमित्त अनेक मान्यवरांचे काव्यवाचन होणार आहे. यामध्ये प्रसिद्ध गायिका आशा भोसले यांची उपस्थिती असणार आहे. शिवाय, जावेद अख्तर, अशोक सराफ, सोनाली बेंद्रे, विकी कौशल, आशुतोष गोवारीकर, अभिजात जोशी, रितेश देशमुख, शर्वरी वाघ, नागराज मंजुळे, विजय दर्डा, भरत दाभोळकर, गिरीष कुभेर, पराग करंदीकर, राजीव खांडेकर, महेश मांजरेकर, लक्ष्मण उतेकर आणि राज ठाकरे यांची उपस्थिती असणार आहे.
मनसे आयोजित अभिजात पुस्तक प्रदर्शन 27 फेब्रुवारी 2025 ते 2 मार्च 2025 या कालावधीत भरवण्यात येणार आहे. महाराष्ट्रातील सर्व नामांकित प्रकाशक या प्रदर्शनात त्यांची पुस्तकं घेऊन येत आहेत. विशेष म्हणजे मराठी साहित्याचं दर्शन घडवणारं हे प्रदर्शन असेल, असं राज ठाकरे यांनी म्हटलं.
सस्नेह जय महाराष्ट्र,
येत्या २७ फेब्रुवारी २०२५ ला, मराठी भाषा गौरव दिनाचं औचित्य साधत मुंबईतील छत्रपती शिवाजी पार्क मैदानावर महाराष्ट्र नवनिर्माण सेना, एक भव्य पुस्तक प्रदर्शन भरवत आहे. हे पुस्तक प्रदर्शन चार दिवस म्हणजे २ मार्च २०२५ पर्यंत असेल. महाराष्ट्रातील सर्व नामांकित… pic.twitter.com/7kjwdFb9iC
— Raj Thackeray (@RajThackeray) February 21, 2025
राज ठाकरेंच्या एक्स पोस्टमध्ये काय?
येत्या २७ फेब्रुवारी २०२५ ला, मराठी भाषा गौरव दिनाचं औचित्य साधत मुंबईतील छत्रपती शिवाजी पार्क मैदानावर महाराष्ट्र नवनिर्माण सेना, एक भव्य पुस्तक प्रदर्शन भरवत आहे. हे पुस्तक प्रदर्शन चार दिवस म्हणजे २ मार्च २०२५ पर्यंत असेल. महाराष्ट्रातील सर्व नामांकित प्रकाशक या प्रदर्शनात त्यांची पुस्तकं घेऊन येत आहेत. मराठी साहित्याचं दर्शन घडवणारं हे सगळ्यात मोठं पुस्तक प्रदर्शन असेल याची मला खात्री आहे.
या प्रदर्शनाचं औपचारिक उदघाट्न झाल्यावर काही मान्यवरांना बोलावून त्यांच्या आवडीची एक कविता त्यांनी म्हणावी असा विचार डोक्यात आला, आणि जवळपास १७ मान्यवरांशी मी बोललो आणि प्रत्येकाने आनंदाने या कल्पनेला होकार दिला. इतक्या मान्यवरांच्या मुखातून मराठी कविता ऐकणे हा एक अनुभव असेल तो प्रत्यक्ष अनुभवायला याच.
पण, या पुस्तक प्रदर्शनाला, तुमच्या कुटुंबाला घेऊन नक्की या. आपली मराठी भाषा ही आपली ओळख आहे आणि आपली शक्ती पण.
या भाषेत किती अफाट साहित्य आणि त्यातून विचार निर्माण झाला आहे हे पुढच्या पिढयांना कळायलाच हवं. आणि हे का करावं लागेल तर आजकाल दोन मराठी माणसं सुद्धा सर्रास एकमेकांशी हिंदी किंवा इंग्रजीत बोलतात. असं का होतंय हे कळत नाही…मराठी उत्तम साहित्याची भाषा होतीच आणि ती परंपरा सुरु आहे ,पण मराठी ही आता ज्ञानची भाषा देखील व्हायला लागली आहे. जगभरातील अनेक उत्तमोत्तम पुस्तकं मराठीत येत आहेत, ज्यातून बदलत्या जगाचं भान येणं सहज शक्य आहे. हे आत्ताच पुढच्या पिढ्यांच्या मनात रुजवावं लागेल. आणि हे जर घडलं तर अजून ताकदीने लेखक, विचारवंत या भूमीत निर्माण होतील.
मराठी माणसात वैश्विक दृष्टिकोन निर्माण व्हावा अशी आमची मनापासून इच्छा आहे, पण त्यासाठीची खिडकी ही मराठीची असावी. आणि म्हणूनच हे पुस्तक प्रदर्शन आयोजित करत आहोत. जरूर या प्रदर्शनाला भेट द्या.
वाट बघतोय…
हेही वाचा – Ganesh Utsav 2025 : सार्वजनिक गणेशोत्सवाच्या मंडपासाठी खणलेल्या खड्ड्यावर 2000 रुपयांचा दंड