HomeमहामुंबईठाणेBhiwandi : भोंदू बाबाकडून महिलेला पाऊणे नऊ लाखांना गंडा 

Bhiwandi : भोंदू बाबाकडून महिलेला पाऊणे नऊ लाखांना गंडा 

Subscribe

महिलेने अंधश्रद्धा निर्मूलन समितीच्या मदतीने शांतीनगर पोलीस ठाण्यात गुन्हा दाखल केला.

भिवंडी । आर्थिक अडचण तसेच कथित काळी जादू उतरवण्यासाठी मृतदेहाची पूजा करायच्या बहाण्याने भोंदू बाबाने महिलेची ८ लाख ८७ हजार रुपयांची फसवणूक केल्याची घटना भिवंडीत घडली. याप्रकरणी महिलेने अंधश्रद्धा निर्मूलन समितीच्या मदतीने शांतीनगर पोलीस ठाण्यात गुन्हा दाखल केला. याप्रकरणी पोलिसांनी भोंदूबाबाला अटक केली. या बाबाला न्यायालयात हजर केले असता पाच दिवसांची पोलीस कोठडी सुनावण्यात आली. अशी माहिती शांतीनगर पोलीस ठाण्याचे वरिष्ठ पोलीस निरीक्षक विनायक गायकवाड यांनी शनिवारी घेतलेल्या पत्रकार परिषदेत दिली. नुसरा अख्तर अलीम अन्सारी (४६) असे फसवणूक झालेल्या महिलेचे नाव आहे. हजरत बाबा उर्फ अमजद असद खान असे अटक करण्यात आलेल्या भोंदू बाबाचे नाव आहे. आरोपी भोंदूबाबा महिलेच्या दुकानात ऑक्टोबर २०२३ मध्ये ग्राहक म्हणून आला. तो या महिलेला म्हणाला तुमच्यावर आणि तुमच्या मुलावर काळी जादू झाली आहे. ही जादू न उतरवल्यास त्याच्या जिवाला धोका आहे, अशी भीती दाखवली. यासाठी पिडीत महिलेचा विश्वास संपादन करण्यासाठी त्यांच्यासमोर घरात केलेल्या पुजे दरम्यान अंड्यामधून खिळा काढून दाखवला होता.

यानंतर काळ्या जादूसाठी मृतदेहाची गरज असून चांदवड मालेगाव येथे मृतदेह मिळणार असल्याचे सांगत पीडित कुटुंबीयांना बाबा चांदवड मालेगाव येथे घेऊन गेले. तेथील दुसर्‍या बाबाच्या साथीदाराने दहा लाख रुपयांत मृतदेह मिळेल असे सांगितल्या नंतर भोंदू बाबाने आठ लाख रुपयांत सौदा केला. त्यांनतर महिलेचा विश्वास बसावा म्हणून एका मृतदेहाचा फोटो मोबाईलवर पाठवला. माहिलेकडे पैसे नसल्याने याच भोंदू बाबाने या पीडित कुटुंबीयाला खाजगी सावकारा कडून महिना नऊ टक्के व्याजाने तीन लाख रुपये कर्जाने पैसे मिळवून दिले. परंतु त्यानंतर भोंदू बाबाने कोणतेही काम न करता फसवणूक केली.

मुक्ता दाभोळकरांची मदत
पीडित महिलेने अंधश्रद्धा निर्मूलन समितीच्या मुक्ता दाभोळकर यांच्याशी संपर्क साधला. त्यांनी दिलेल्या माहितीनुसार जिल्हाध्यक्ष वंदना शिंदे यांच्याकडे पीडित महिलेने आपली कैफियत मांडली. त्यांनी ही घटना पोलीस आयुक्तांना सांगताच पोलिस प्रशासनाची चक्रे वेगाने फिरली. त्यानंतर पीडित महिलेने दिलेल्या तक्रारी वरून शांतीनगर पोलिस ठाण्यात हजरत बाबा उर्फ अमजद असद खान या विरोधात गुन्हा दाखल करून भोंदू बाबाच्या मुसक्या आवळल्या आहेत.