राज्यात मागील २४ तासांत २ हजार९५६ रुग्णांची नोंद, तर मृत्यूच्या आकड्यात वाढ

राज्यात मागील काही दिवसांपासून कोरोना रूग्णांच्या (Corona Virus) संख्येत लक्षणीय वाढ होताना दिसत आहे. राज्यात गेल्या २४ तासांत २ हजार९५६ कोरोनाबाधित रुग्णांची नोंद करण्यात आली आहे. तर मृत्यूच्या आकड्यात वाढ झाली आहे. राज्यात आज चार कोरोना बाधित रुग्णाच्या मृत्यूची नोंद झालेली आहे. सध्या राज्यातील मृत्यूदर (Deaths) १.८६ टक्के एवढा आहे.

राज्यात आज २ हजार १६५ रुग्ण बरे होऊन घरी गेले आहेत. तर राज्यात आजपर्यंत एकूण ७७,४९,२७६ कोरोना बाधित रुग्ण बरे होऊन घरी गेले आहेत. यामुळे राज्यातील रुग्ण बरे होण्याचे प्रमाण (Recovery Rate) ९७.९० टक्के एवढे झाले आहे. आजपर्यंत तपासण्यात आलेल्या ८,१३,८३,११५ प्रयोगशाळा नमुन्यांपैकी ७९,१५,४१८ (०९.७३ टक्के) नमुने पॉझिटिव्ह आले आहेत.

राज्यातील जिल्हा आणि मनपानिहाय रुग्णांचा तपशील पुढीलप्रमाणे आहे –

राज्यात बी ए.५ व्हेरीयंटचे आणखी २ रुग्ण ठाण्यात आढळले

राष्ट्रीय विषाणू विज्ञान संस्था, पुणे यांच्या ताज्या अहवालानुसार, राज्यात बीए. ५ व्हेरियंटचे आणखी २ रुग्ण ठाणे शहरात आढळून आले आहेत. या पैकी एक रुग्ण २५ वर्षांची महिला तर दुसरा रुग्ण ३२ वर्षांचा पुरुष आहे. हे रुग्ण २८ आणि ३० मे २२ रोजी कोविड बाधित आढळले आणि हे दोन्ही रुग्ण घरगुती विलगीकरणात बरे झाले. या दोन्ही रुग्णांचे लसीकरण झालेले आहे.

बी. जे. वैद्यकीय महाविद्यालय पुणे यांनी दिलेल्या माहितीनुसार जनुकीय क्रमनिर्धारणात सध्या राज्यात सर्वाधिक रुग्ण बीए. २ या विषाणू उपप्रकाराचे आढळत असून त्या खालोखाल बी ए.२.३८ चे रुग्ण आढळत आहेत.

मुंबईकरांची चिंता वाढली

केंद्रीय आरोग्य मंत्रालयाने जारी केलेल्या आकडेवारीनुसार, देशात सोमवारी दिवसभरात ६ हजार ५९४ रुग्ण आढळून आले आहेत. तर गेल्या २४ तासांत ४ हजार ३५ रुग्ण कोरोना विषाणूच्या संसर्गातून मुक्त झाले आहेत. आज राज्यात २ हजार ९५६ नव्या रुग्णांची नोंद झाली आहे. सर्वाधिक रुग्ण हे मुंबई शहरातील असून मुंबईत आज १ हजार ७२४ रुग्णांची नोंद झाली आहे.

हेही वाचा : विविध क्षेत्रातून महाराष्ट्राने देशाला प्रेरित केलं – पंतप्रधान नरेंद्र मोदी