मुंबई : शिवसेना उद्धव बाळासाहेब ठाकरे पक्षाचे खासदार संजय राऊत यांनी काल, सोमवारी एक फोटो ट्वीट करत, महाराष्ट्र पेटलेला आहे आणि हे महाशय मकाऊ येथे कॅसिनोत जुगार खेळत आहेत, असे म्हटले होते. विशेष म्हणजे, केंद्रीय गृहमंत्री अमित शहा आणि उपमुख्यमंत्री देवेंद्र फडणवीस यांना हे ट्वीट टॅग केले होते. या फोटोवर भाजपा प्रदेशाध्यक्ष चंद्रशेखर बावनकुळे यांनी खुलासा केला होता. तर, आज, मंगळवारी पुन्हा संजय राऊत यांनी हा फोटो शेअर करत भाजपावर निशाणा साधला आहे.
हेही वाचा – 2024ला आम्हीच जिंकू, असे सांगणाऱ्यांना…; ठाकरे गटाचा भाजपावर निशाणा
ठाकरे गटाचे खासदार संजय राऊत यांनी सोमवारी ट्वीट केलेल्या फोटोतील व्यक्ती भाजपा प्रदेशाध्यक्ष चंद्रशेखर बावनकुळे यांच्यासारखी दिसते. महाराष्ट्र पेटलेला आहे आणि हे महाशय मकाऊ येथे कॅसिनोत जुगार खेळत आहेत. 19 नोव्हेंबरच्या मध्यरात्री मकाऊमध्ये साधारण 3.50 कोटी कॅसिनो जुगारात उडवले असे प्रत्यक्षदर्शी सांगतात. हिंदुत्ववादी असल्याने महाशय द्यूत खेळले तर बिघडले कोठे? अशी कॅप्शन देतानाच, ‘फोटो झूम करून पाहा… ते तेच आहेत ना?’ असा प्रश्न त्यांनी केला होता.
Did I name or made allegations against anyone in my tweet ? NO !
All I said in my simple Tweet was that ‘some Nero is busy gambling in Macau (China) as Maharashtra burns…’
But the BJP threw a hit wicket and went on to announunce that the person in picture is ‘their’ State… pic.twitter.com/Ni6oaqt2Tf
— Sanjay Raut (@rautsanjay61) November 21, 2023
त्यानंतर खुद्द चंद्रशेखर बावनकुळे यांनीच ट्वीट करत खुलासा केला होता. मी मकाऊ येथे ज्या हॉटेलमध्ये सहकुटुंब मुक्कामी होतो, तेथील हा परिसर आहे. या हॉटेलच्या ग्राऊंड फ्लोअरवर रेस्टॉरंट आणि कॅसिनो एकच आहे. जेवण केल्यानंतर मी कुटुंबीयांसह रेस्टॉरंटमध्ये बसलो असताना कुणीतरी काढलेला हा फोटो आहे, असे त्यांनी स्पष्ट केले होते. त्याचबरोबर महाराष्ट्र भाजपाने संजय राऊत यांना प्रत्युत्तर दिले होते. आमचे प्रदेशाध्यक्ष चंद्रशेखर बावनकुळे आयुष्यात कधी जुगार खेळलेले नाहीत. ते ज्या हॉटेलमध्ये सहकुटुंब मुक्कामी तेथील हा परिसर आहे. ज्यांच्या आयुष्याचा जुगार झालाय, त्यांची दृष्टी त्यापलीकडे जाऊ शकत नाही, असा पलटवार भाजपाने केला होता.
हेही वाचा – भारतीय क्रिकेटचे नेतृत्व भाजपाच्या ‘वंशवादा’कडे… ठाकरे गटाचा जोरदार हल्लाबोल
त्यावर आज, मंगळवारी पुन्हा संजय राऊत यांनी तोच फोटो शेअर करत भाजपाला डिवचले आहे. मी माझ्या ट्विटमध्ये कोणाचे नाव घेतले किंवा कोणाविरुद्ध आरोप केले का? तर नाही! मी माझ्या साध्या ट्वीटमध्ये एवढेच म्हटले आहे की, ‘महाराष्ट्र पेटलेला असताना काही निरो मकाऊमध्ये (चीन) जुगार खेळण्यात मग्न आहे…’ पण भाजपाने एक हिट विकेट फेकली आणि जाहीर केले की फोटोतील व्यक्ती ‘त्यांचे’ प्रदेशाध्यक्ष आहेत! यालाच हिंदीत ‘आ बैल, मुझे मार’ म्हणतात, असे त्यांनी म्हटले आहे.
