ठाणे : ठाणे महानगरपालिका शाळांच्या इमारती दुरुस्तीचे काम हाती घेण्यात आले आहे. मात्र, काही शाळांची कामे संथगतीने सुरू आहेत. त्याची दखल महापालिका प्रशासनाने घेतली आहे. अशा संबंधित कार्यकारी अभियंत्यांना नोटीस बजावण्यात आल्या असून विहित मुदतीत नोटिशीला उत्तर न दिल्यास शिस्तभंगाची कारवाई करण्यात येणार येईल, असा इशारा पालिका आयुक्त अभिजीत बांगर यांनी दिला आहे.
हेही वाचा – ऑगस्टमध्ये सरासरीच्या केवळ 42 टक्के पाऊस, 15 जिल्ह्यांत मोठी तूट; पिण्याचा पाण्याचा प्रश्न निर्माण होणार?
महापालिकेच्या शाळांमध्ये शिकणाऱ्या विद्यार्थ्यांना शाळा व शिक्षणाविषयी आपुलकी निर्माण व्हावी किंबहुना आपल्या शाळेची इमारत ही सुस्थितीत असावी. शिक्षण घेताना त्यांना आनंद मिळावा यासाठी महापालिकेच्या शाळा दुरुस्तीसाठी 15 कोटी रुपये मंजूर करण्यात आले आहेत. त्यानुसार काही शाळांची कामे पूर्णत्वाच्या मार्गावर आहेत, ज्या शाळांची कामे अद्याप सुरू झालेली नाहीत किंवा काही शाळांची कामे धीम्या गतीने सुरू आहेत, त्यांना नोटिसा बजावण्यात आल्या आहेत. या इमारतींच्या दुरुस्तीचे काम लवकरात लवकर पूर्ण करण्याचे निर्देश आयुक्त अभिजीत बांगर यांनी दिले होते.
शाळांमध्ये विद्यार्थ्यांचा सतत वावर सुरू असतो, त्यामुळे कोणतीही दुर्घटना घडू नये यासाठी शाळांची दुरूस्ती प्राधान्याने होणे आवश्यक आहे. शाळांच्या दुरूस्तीचा कार्यादेश मार्च 2023मध्ये देण्यात येऊनही दुरुस्तीचे काम पूर्ण न झाल्याने संबंधित कार्यकारी अभियंत्यांना नोटीस बजावण्यात आली असल्याचे आयुक्त बांगर यांनी नमूद केले.
हेही वाचा – Photo : पिंपरी-चिंचवडमध्ये उपमुख्यमंत्री अजित पवार यांचे जंगी स्वागत
ठाणे महानगरपालिका क्षेत्रामधील ज्या शाळांची दुरूस्ती आवश्यक आहे अशा एकूण 34 शाळा दुरूस्तीच्या कामांच्या खर्चाची रक्कम सुमारे 15 कोटी असून एकत्रित निविदा सन 2022-23 अंतर्गत प्रसिद्ध करण्यात आली होती. तसेच त्यासाठीचा कार्यादेशही 08 मार्च 2023 रोजी देण्यात आला होता. तथापि, फक्त 5 शाळांच्या दुरुस्तीचे काम 100 टक्के पूर्ण झाले आहे. तर 9 शाळांच्या दुरूस्तीचे काम 50 टक्क्यापेक्षा जास्त झाले असून ती कामे प्रगतीपथावर आहे. मात्र 8 शाळांच्या दुरूस्तीचे काम संथगतीने सुरू असून ही कामे अत्यंत असमाधानकारक आहेत. तर 12 शाळांच्या दुरूस्तीच्या कामाची सुरुवातच झालेली नाही.
‘या’ शाळेचे कामे 40 ते 20 टक्केच
वागळे विभागातील ठामपा शाळा क्र. 23 चे दुरुस्ती काम 40 टक्के, कळवा विभागातील शाळा क्र. 129, 69, 70, 115, 29 या शाळांचे 30 टक्के, माजिवडा मानपाडा शाळा क्र. 53, 54 व लोकमान्य सावरकनगर विभागातील शाळा 46चे काम 25 टक्के, वर्तकनगर विभागातील शाळा क्र. 65 व मुंब्रा विभागातील शाळा क्र. 75, 118 चे 20 टक्के काम पूर्ण झाले आहे.ॉ
काम सुरू न झालेल्या शाळा
कळवा विभागातील शाळा क्र. 4, 6, 72, 68, माजिवडा मानपाडा विभागातील शाळा क्र. 59, 52, 128, मुंब्रा विभागातील शाळा क्र. 78, 123, 113, 77, 124, 116, दिवा विभागातील शाळा क्र. 85, 90, 91 तर नौपाडा विभागातील शाळा क्र.16 या शाळांच्या कामांना अद्याप सुरूवात झालेली नाही. या शाळांच्या कामाची जबाबदारी सोपविलेल्या कार्यकारी अभियंत्यांना नोटीस बजावण्यात आली असून अपूर्ण असलेल्या कामांबाबतचा लेखी खुलासा मागविण्यात आला आहे. तसेच विहित मुदतीत खुलासा न दिल्यास संबंधितांवर शिस्तभंगाची कारवाई करण्यात येणार आहे.
महानगरपालिकेच्या शाळा भौतिकदृष्ट्या सुस्थितीत असाव्यात, शाळांमध्ये गळती नसावी, शौचालय सुस्थितीत असावेत तसेच रंगरंगोटीसहीत शाळेतील परिसर देखील सर्व नीटनेटका असावा यासाठी शाळांच्या दुरूस्तींची कामे हाती घेण्यात आली आहेत. ही कामे गुणवत्तेने होणे तर आवश्यक आहेच, त्याचवेळी ही कामे कालमर्यादेमध्ये पूर्ण होणेही गरजेचे आहे, याबाबत कोणतीही दिरंगाई खपवून घेतली जाणार नाही अशा सूचना कार्यकारी अभियंत्यांना दिल्या आहेत.
– अभिजित बांगर, आयुक्त, ठामपा
