दोन दिवसानंतर अखेर ‘हर हर महादेव’चा ‘शो ऑन’; प्रेक्षकांचा अत्यल्प प्रतिसाद

नाशिक : ‘हर हर महादेव’ चित्रपटामुळे मागील दोन दिवसापासून नाशिकच राजकारण ढवळून निघत असताना अखेर बुधवारी (दी.९) सायंकाळी ७ वाजता शहरातील दोन चित्रपटगृहात शो सुरू करण्यात आले. राज्यात चित्रपटावरुन वादंग निर्माण झाल्यानंतर नाशिक मधील चित्रपटगृह चालकांनी वाद मिटत नाही तोपर्यंत चित्रपटाचा शो न चालवण्याचा निर्णय घेतला होता. याबाबत मनसेने आक्रमक भूमिका घेत शहरातील पीव्हीआर चित्रपटगृहात भेट देत निवेदन सादर केले. राज ठाकरे यांचा आवाज लाभलेला छत्रपती शिवाजी महाराज यांच्या जीवनावर आधारित मराठी चित्रपटाचा शो सुरू करावा अन्यथा मनसे स्टाईल आंदोलन करण्यात येईल, असा इशारा मनसेकडून देण्यात आला होता. मनसेच्या मागणीला आज यश आल्याचे दिसून आले. सिटी सेंटर मॉलमधील पीव्हीआर आणि नाशिकरोड येथील रेजिमेंटल प्लाझा या दोन चित्रपटगृहात सायंकाळी अनुक्रमे ६.५५ आणि ७ वाजता शो दाखवण्यात आला. शो सुरू होण्याआधी संभाजी ब्रिगेडने विरोध दर्शवला परंतु पोलीस प्रशासनाच्या मध्यस्थीने अखेर दोन्ही ठिकाणी नियोजित वेळेत शो सुरू झाले. परंतु, वादाच्या पार्श्वभूमीवर चित्रपटाला प्रेक्षकांचा अत्यल्प प्रतिसाद लाभला. सिटी सेंटर मॉल मधील पीव्हीआर चित्रपटगृहात २०२ आसनं संख्या असताना मात्र ५६ प्रेक्षकांनी सिनेमा बघण्याला पसंती दर्शवली.