मुंबई : रायगडच्या पालकमंत्रिपदावरून सुरू असलेला वाद थांबवण्याचं नाव घेत नाही. आदिती तटकरे यांना रायगडचे पालकमंत्री केल्यानं शिंदे गट नाराज झाला होता. त्यामुळे रायगडच्या पालमंत्रिपदाला स्थगिती दिली आहे. यावरून शिंदे गटातील आमदार, मंत्री भरत गोगावले यांनी राष्ट्रवादी काँग्रेसचे ( अजितदादा पवार ) प्रदेशाध्यक्ष सुनील तटकरे यांच्यावर निशाणा साधला होता. याला आता राष्ट्रवादी काँग्रेस ( अजितदादा पवार ) युवकचे प्रदेशाध्यक्ष सूरज चव्हाण यांनी प्रत्युत्तर देताना गोगावलेंवर टीका केली आहे.
एकनाथ शिंदे यांनी भरत गोगावलेंना आवर घालावी. दोस्तीत कुस्ती कर नये. रायगडचा पालकमंत्री राष्ट्रवादीचाच असेल. सहपालकमंत्री भरत गोगावले असतील, असं सूरज चव्हाण यांनी ठणकावून सांगितलं आहे. ते प्रसारमाध्यमांशी संवाद साधत होते.
हेही वाचा : हिंगोलीचे पालकमंत्रिपद मिळाल्यानं झिरवाळ नाराज? म्हणाले, गरिबाला गरीब जिल्ह्याचे…
सूरज चव्हाण म्हणाले, “भरत गोगवालेंनी आपली उंची पाहून बोलले पाहिजे. आम्हाला काढायचे म्हणले, तर गुवाहाटीलमधील हॉटेलच्या बाहेरचे आणि हॉटेलमधील व्हिडिओ सुद्धा आम्ही काढू शकतो. एकनाथ शिंदे यांनी गोगावलेंना आवर घालावा. चांगले चालू असताना दोस्तीत कुस्ती करू नये.”
“मुख्यमंत्री देवेंद्र फडणवीस यांनी याप्रकरणात लक्ष घालून योग्य तो न्याय निवाडा द्यावा. महायुतीच्या निर्णयांचे स्वागत करण्याचं काम राष्ट्रवादीनं केले आहे. रायगडचा पालकमंत्री आमचाच असेल. सहपालकमंत्री भरत गोगावले असतील,” असं सूरज चव्हाण यांनी म्हटलं.
गोगावले तटकरेंवर काय बोलले होते?
“आम्ही व्यवहाराने चालणारे आहोत. आमचं काम प्रामाणिक आहे. आम्ही चुकीचे काही करत नही. सुनील तटकरेंनी विधानसभा निवडणुकीत प्रामाणिकपणे आमचं काम केले असते, तर आम्ही पालकमंत्रिपदाबाबत विचार केला असता. पण, तटकरेंनी आमचं काम केलं नाही. तटकरेंनी आमच्या पाठीत पुन्हा खंजीर खुपसला. जे स्वत:च्या भावाचे होऊ शकले नाहीत. ते तुमचे-आमचे काय होणार?” असा प्रश्न गोगावलेंनी उपस्थित केला आहे.
हेही वाचा : छावा चित्रपटातील ‘त्या’ सीनबाबत उदयनराजेंचा थेट दिग्दर्शकाला फोन; म्हणाले, एका दृष्यात…