नुकताच UPSC परीक्षेचा निकाल जाहीर झाला आहे. या परीक्षेत मुलींनी उत्कृष्ट कामगिरी करत आपले वर्चस्व कायम ठेवले आहे. रायगडमधून देखील एकमेव विद्यार्थीनी या परीक्षेत पास झाली आहे. आयेशा इब्राहिम काझी असे या विद्यार्थीनीचे नाव असून तिने या परीक्षेत मोठ्ठं यश संपादित केले. रायगड जिल्ह्यातून UPSC परीक्षेत आयेशा ही एकमेव विद्यार्थीनी पास झाल्याने तिचे सर्व स्तरांतून कौतुक करण्यात येत आहे. तिची जिद्द व अभ्यास करण्याचे नियोजन यामुळे तिला यूपीएससी परीक्षेत हे यश मिळाले असून ती 586 व्या क्रमांकाने उत्तीर्ण झाली आहे.
कोण आहे आयेशा काझी?
आयेशा काझीचे कुटुंब हे मूळचे कोकणातील दापोली तालुक्यामधील अडखळ जुईकर मोहल्ला येथील आहे. हे कुटुंब गेले अनेक वर्ष ठाणे जिल्ह्यातील कळवा येथे व्यवसायानिमित्त वास्तव्यास होते. आयेशाचे वडील व्यवसायिक आहेत तर आयेशाची आई अरबी भाषेतून उर्दू भाषेचे ट्रान्सलेशनचे क्लासेस घेते. आयेशा काझी ही लहानपणापासूनच हुशार असल्याने ती नेहमीच गुणवत्ता यादीमध्ये उत्तम कामगिरी करत राहिली आहे. महाराष्ट्र राज्य बोर्डाच्या दहावीच्या परीक्षेत तिने 94 टक्के गुण मिळवले होते तर इयत्ता बारावी मध्ये तिने 89.54% गुण संपादित केले होते. पदवी पर्यंतचे शिक्षण तिने कला शाखेतून इतिहास हा विषय घेऊन पूर्ण केले आहे. आयेशाचे बालपण आणि शिक्षण सगळं मुंबईतच झाले असून तिने ठाण्यातील जोशी बेडेकर महाविद्यालयातून आपले पदवीचे शिक्षण पूर्ण केले आहे.
आयेशा काझी हिने 2019 पासून UPSC च्या परीक्षेची तयारी करण्यास सुरूवात केली होती. तिने आत्तापर्यंत तीन वेळा ही परीक्षा दिली आहे. परंतु तिला त्यात यश आले नाही. पण अखेरीस या परीक्षेत तिने यशस्वी कामगिरी करत यश मिळवले. आयेशाने आपल्या यशाचे श्रेय आई-वडिलांना दिले आहे. तसेच हज हाऊसमध्ये विद्यार्थ्यांकरता सुरू करण्यात आलेल्या कोचिंग क्लासेसमधून तिने आपल्याला मोठे मार्गदर्शन मिळाल्याचे सांगितले. जुनिअर कॉलेजमध्ये असताना आयेशामधील गुणवत्ता पाहून तिच्या शिक्षक प्राध्यापक इम्रान सर यांनीही आयेशाला मार्गदर्शन केले होते, अशी माहिती तिच्याकडून देण्यात आली आहे.
हेही वाचा – ₹2,000 नोटवापसी : ओळखपत्राशिवाय जमा करा नोटा; Delhi HC याचिकेवर म्हणाले…
