दिवंगत बाळासाहेब ठाकरे यांच्या जयंतीनिमित्त विधानभवनाच्या सेंट्रल हॉलमध्ये त्यांचे तैलचित्र लावण्यात आले आहे. मात्र, बाळासाहेबांचे हे तैलचित्र वादाच्या भोवऱ्यात सापडले आहे. तैलचित्रकार चंद्रकला कदम यांनी काढलेले तैलचित्र ऐनवेळी बदलण्यात आले. त्याऐवजी चित्रकार किशोर नादावडेकर यांनी काढलेले बाळासाहेबांचे तैलचित्र विधानभवनाच्या सेंट्रल हॉलमध्ये लावण्यात आले. त्यावरून चंद्रकला कदम यांनी नाराजी व्यक्त केली आहे.
चंद्रकला कदम नेमकं काय म्हणाल्या?
“बाळासाहेब ठाकरे यांनी माझ्या चित्रकारितेच्या कौशल्यावर विश्वास ठेवला. त्यामुळे मला देशाच्या संसदेत आणि गुजरात विधानभवनामध्ये स्वातंत्र्यवीर सावरकरांचं तैलचित्र काढण्याची संधी मिळाली. बाळासाहेबांनीच पंतप्रधान नरेंद्र मोदी यांच्याकडे गुजरात विधानभवनात सावरकरांचे तैलचित्र काढण्यासाठी माझ्या नावाची शिफारस केली होती. मी महाराष्ट्राच्या विधानभवनात सहा तैलचित्र काढली आहे. बाळासाहेब ठाकरे यांचे तैलचित्र काढण्याची सरकारी ऑर्डर मला मिळाली. असे असताना हे तैलचित्र बदलण्यात आले. बाळासाहेब ठाकरे यांनी एका चित्रकाराच्या दृष्टीकोनातून जो विश्वास माझ्यावर टाकला, त्या विश्वासाचा तुम्ही अपमान करू नये” अशा शब्दांत तैलचित्रकार चंद्रकला कदम यांनी आपली नाराजी व्यक्त केली.
मिळालेल्या माहितीनुसार, तैलचित्रकार चंद्रकला कदम यांचे चित्र मुख्यमंत्री दालनात लावण्यात येणार आहेत. तसेच, चित्रकार किशोर नादावडेकर यांनी काढलेले बाळासाहेब ठाकरे यांचे तैलचित्र विधानभवनाच्या सेंट्रल हॉलमध्ये लावण्यात येणार आहे.
बाळासाहेब ठाकरे यांच्या तैलचित्र अनावरणाच्या कार्यक्रमाला सर्वपक्षीय नेतेमंडळी उपस्थित होते. मुख्यमंत्री एकनाथ शिंदे, उपमुख्यमंत्री देवेंद्र फडणवीस, विधानसभा अध्यक्ष राहुल नार्वेकर, विरोधीपक्षनेते अजित पवार, विधानपरिषद उपसभापती नीलम गोऱ्हे, केंद्रीय मंत्री नारायण राणे तसंच मनसे अध्यक्ष राज ठाकरे यांच्यासह दिग्गजांनी या तैलचित्र अनावरणाच्या कार्यक्रमाला हजेरी लावली.
हेही वाचा – मुंबईत थंडी वाढली; किमान तापमान १५ अंशाखाली जाण्याची शक्यता
